நேபாளத்தின் 47வது பிரதமராக பாலேந்திர ஷா பதவியேற்பு – ஆசியாவின் இளம் தலைவராக புதிய வரலாறு.!!!
நேபாளத்தில் கடந்த ஆண்டு ஏற்பட்ட அரசியல் மாற்றங்களைத் தொடர்ந்து, 35 வயதான பாலேந்திர ஷா இன்று (27) நாட்டின் 47வது பிரதமராக பதவியேற்றார். இவரின் பதவி ஏற்றல் நேபாள வரலாற்றிலும், தென் ஆசிய அரசியலிலும் மிக இளம் வயதில் பிரதமர் பதவியை வகிக்கும் முக்கிய நிகழ்வாகும்.
பாலேந்திர ஷா, முன்னதாக புகழ்பெற்ற ரெப் கலைஞராகவும், காத்மாண்டு மாநகர மேயராகவும் பணியாற்றி, இளைஞர்களிடையே பெரும் புகழை பெற்றவர். கடந்த ஆண்டு ‘ஜென் இசட்’ (Gen Z) போராட்டத்தின் பின்னர் முன்னாள் பிரதமர் கே.பி. சர்மா ஒலியின் கம்யூனிஸ்ட் ஆட்சி கவிழ்ந்தது. இடைக்காலத் தலைவராக முன்னாள் உச்சநீதிமன்ற நீதிபதி சுஷீலா கார்கி பதவி வகித்திருந்தார்.
பாலேந்திர ஷாவின் ராஷ்டிரிய ஸ்வதந்த்ரா கட்சி, நேபாள நாடாளுமன்றத்தில் உள்ள 275 இடங்களில் 182 இடங்களைப் பிடித்து தனிப்பெரும்பான்மையுடன் வெற்றி பெற்றது. ஜாபா-5 தொகுதியில் போட்டியிட்ட பாலேந்திர ஷா, முன்னாள் பிரதமர் கே.பி. சர்மா ஒலியை 49,614 வாக்குகளால் பின்னிட்டு வெற்றி பெற்றார்.
1990 ஆம் ஆண்டு காத்மாண்டுவில் பிறந்த பாலேந்திர ஷா, கட்டமைப்பு பொறியாளர் (Structural Engineer). இவர் இந்தியாவின் கர்நாடக மாநிலத்தில் உள்ள விஸ்வேஸ்வரய்யா தொழில்நுட்பப் பல்கலைக்கழகம் (Visvesvaraya Technological University) இல் முதுகலைப் பட்டம் பெற்றவர்.
நேபாளத்தின் பாரம்பரிய அரசியல் கட்சிகளின் நீண்டகால ஆதிக்கத்தை முறியடித்து, இளம் தலைவராக நாட்டின் உயரிய பதவியைப் பிடித்த பாலேந்திர ஷா, தென் ஆசிய அரசியலில் புதிய வரலாற்றைக் கொடுத்துள்ளார்.
பாலேந்திர ஷாவின் தலைமைத்துவம் நேபாளத்தின் பொருளாதார வளர்ச்சி, சமூக முன்னேற்றம் மற்றும் இளைஞர்கள் பெருமிதத்திற்கான புதிய உத்வேகம் ஏற்படுத்தும் என மக்கள் பெரிதும் எதிர்பார்க்கின்றனர்.
