ஆழ்கடலில் கடுமையாக நோய்வாய்ப்பட்ட மீனவரை: கரைக்கு மீட்ட கடற்படை.!!!
(கற்பிட்டி நிருபர் – சியாஜ்)
இலங்கையின் தெற்கு கடற்கரையின் ஆழ்கடலில் கடுமையாக நோய்வாய்ப்பட்ட நிலையில் இருந்த ஒரு மீனவரை, கடல்சார் தேடல் மற்றும் மீட்பு ஒருங்கிணைப்பு மையத்தின் ஒருங்கிணைப்பின் கீழ் கடற்படை கப்பல் மூலம் அவசரமாக கரைக்கு கொண்டு வந்து சிகிச்சைக்காக அனுப்பியுள்ளதாக இலங்கை கடற்படை தெரிவித்துள்ளது.
காலி மீன்பிடித் துறைமுகத்தைச் சேர்ந்த ஏழு மீனவர்களை ஏற்றிச் சென்ற பல நாள் மீன்பிடிக் கப்பலான ‘சினுஷ’ (IMUL-A-2195GLE), 2025 டிசம்பர் 25 அன்று இலங்கைக்கு தெற்கே சுமார் 474 கடல் மைல் தொலைவில் உள்ள ஆழ்கடலில் மீன்பிடி நடவடிக்கைகளில் ஈடுபட்டிருந்தது. இந்நிலையில், அந்தக் கப்பலில் இருந்த மீனவர்களில் ஒருவர் திடீரென கடுமையான மார்பு வலியால் பாதிக்கப்பட்டு மிகவும் மோசமான நிலையில் நோய்வாய்ப்பட்டார்.
இதனைத் தொடர்ந்து, மீனவரை உடனடியாக கரைக்கு கொண்டு வந்து சிகிச்சை அளிக்குமாறு மீன்வள மற்றும் நீர்வளத் துறை, கடற்படை தலைமையகத்திற்கு அருகில் அமைந்துள்ள கொழும்பு கடல்சார் தேடல் மற்றும் மீட்பு ஒருங்கிணைப்பு மையத்திடம் உதவி கோரியது. அதற்கு உடனடியாக பதிலளித்த கடற்படை, தொலைபேசி மூலம் (Tele Therapy) தேவையான மருத்துவ ஆலோசனைகளை வழங்கியதுடன், நோயாளியை அருகிலுள்ள மீன்பிடித் துறைமுகத்திற்குக் கொண்டு வருமாறு அறிவுறுத்தியது.
மேலும், நோயாளியை விரைவாக தரைக்குக் கொண்டு வருவதற்காக தெற்கு கடற்படை கட்டளைக்குச் சொந்தமான ஒரு படகை சம்பந்தப்பட்ட கடல் பகுதிக்குக் கடற்படை அனுப்பியது.
அதன்படி, திங்கட்கிழமை (19) காலை காலி துறைமுகத்திற்கு அருகிலுள்ள கடல் பகுதியில் இருந்து ஆபத்தான நிலையில் இருந்த மீனவரை கடற்படை மீட்டு, அடிப்படை முதலுதவி அளித்த பிறகு, அவரை உடனடியாக காலி துறைமுகத்திற்கு கொண்டு வந்து, சிகிச்சைக்காக காலியில் அமைந்துள்ள கராப்பிட்டிய போதனா மருத்துவமனைக்கு அனுப்பி வைத்தது.
இதேவேளை, கொழும்பு கடல்சார் தேடல் மற்றும் மீட்பு ஒருங்கிணைப்பு மையத்தின் ஒருங்கிணைப்பில், இலங்கை கடல்சார் தேடல் மற்றும் மீட்பு மண்டலத்திற்குள் துன்பத்தில் உள்ள கடல்சார் மற்றும் மீனவ சமூகத்திற்கு தேவையான உதவிகளை வழங்குவதற்கு கடற்படை எப்போதும் தயாராக உள்ளதாக கடற்படை மேலும் தெரிவித்துள்ளது.
