இயற்கை முதல் கடலரிப்பு வரை; அம்பாறையில் காத்தான்குடி மீடியா போரத்தின் சிறப்பு கள விஜயம்.!!!

-எம்.ஐ.அப்துல் நஸார்-

காத்தான்குடி மீடியா போரத்தின் உறுப்பினர்கள் அம்பாறை மாவட்டத்தை நோக்கி மேற்கொண்ட உத்தியோகபூர்வ கள விஜயம் கடந்த ஞாயிற்றுக்கிழமை (23) சிறப்பாகவும் பயனுள்ளதாகவும் இடம்பெற்றது. ஊடகப் பணிகளுக்கு அப்பால் உறுப்பினர்களுக்கிடையிலான நட்புறவு, ஒற்றுமை மற்றும் அனுபவப் பகிர்வை மேம்படுத்தும் நோக்கில் இந்த விஜயம் ஏற்பாடு செய்யப்பட்டிருந்தது.

காத்தான்குடி மீடியா போரத்தின் தலைவர் எம்.எஸ்.எம். நூர்தீன் தலைமையில் இடம்பெற்ற இந்த கள விஜயத்திற்கான ஏற்பாடுகளை போரத்தின் இணைப்பாளர் எம்.பஹத் ஜுனைட், பொருளாளர் எம்.எப்.எம்.பஸால் ஜிப்ரி மற்றும் போரத்தின் உறுப்பினர் பாரிஸ் அமானுல்லாஹ் ஆகியோர் இணைந்து மேற்கொண்டிருந்தனர்.

காலை 7.30 மணியளவில் காத்தான்குடி மெத்தை பெரிய ஜும்ஆ பள்ளிவாசல் முன்றலில் இருந்து உறுப்பினர்களின் பயணம் ஆரம்பமானது. உற்சாகமான சூழலில் ஆரம்பிக்கப்பட்ட இந்தப் பயணம், உறுப்பினர்களுக்கு ஒரு புதிய அனுபவத்தையும் பல்வேறு பகுதிகளை நேரில் பார்வையிடும் வாய்ப்பையும் ஏற்படுத்தியது.

அம்பாறை மாவட்டத்தை நோக்கிய பயணத்தின் முதல் முக்கிய கட்டமாக ஹிமிதுருவாவ பகுதியில் அமைந்துள்ள நீரஅருவிக்கு உறுப்பினர்கள் விஜயம் மேற்கொண்டனர். இயற்கை எழில் கொஞ்சும் அந்தப் பகுதி உறுப்பினர்களை பெரிதும் கவர்ந்தது.

அங்கு காணப்பட்ட இயற்கை வளங்கள், பசுமையான சூழல் மற்றும் நீர்வீழ்ச்சியின் அழகு ஆகியவற்றை உறுப்பினர்கள் ரசித்தனர். அன்றாட ஊடகப் பணிகளின் அழுத்தத்திலிருந்து சிறிது நேரம் விடுபட்டு இயற்கையுடன் இணைந்து மகிழ்வதற்கான சந்தர்ப்பமாகவும் இந்த விஜயம் அமைந்தது.

இதனைத் தொடர்ந்து பயணம் இறக்காமம் பகுதியை நோக்கி தொடர்ந்தது. அங்கு அமைந்துள்ள மூன் யார்ட் உணவகத்தில் உறுப்பினர்களுக்கான பகல் விருந்து ஏற்பாடு செய்யப்பட்டிருந்தது. பகல் உணவுக்கான முழுமையான ஏற்பாடுகளை காத்தான்குடி மீடியா போரத்தின் உறுப்பினர் பாரிஸ் அமானுல்லாஹ் மேற்கொண்டிருந்தார்.

உணவு மற்றும் ஓய்வுக்குப் பின்னர் ஊடகப் பயணத்தின் இரண்டாம் கட்டம் ஆரம்பமானது. பிற்பகல் நேரத்தில் உறுப்பினர்கள் சாய்ந்தமருது பிரதேசத்தை நோக்கி பயணித்தனர்.

பிற்பகல் சுமார் 4.30 மணியளவில் சாய்ந்தமருதில் அமைந்துள்ள ஊடகவியலாளர் ஜனூஸ் அவர்களின் ‘வியூகம்’ கலையகத்திற்கு காத்தான்குடி மீடியா போரத்தின் உறுப்பினர்கள் விஜயம் மேற்கொண்டனர்.

இதன்போது ஊடகத்துறை தொடர்பான அனுபவங்கள், ஊடகவியலாளர்கள் எதிர்நோக்கும் சவால்கள் மற்றும் நவீன கால ஊடகப் போக்குகள் தொடர்பில் கருத்துப் பரிமாற்றங்களும் இடம்பெற்றன. உள்ளூர் ஊடக செயற்பாடுகளை மேம்படுத்துவதற்கான அவசியம் தொடர்பிலும் கவனம் செலுத்தப்பட்டது. மேற்படி சந்திப்பு வியூகம் தொலைக்காட்சியில் நேரலையாக அஞ்சல் செய்யப்பட்டது.

இதனைத் தொடர்ந்து காத்தான்குடி மீடியா போரத்தின் உறுப்பினர்கள் சாய்ந்தமருது கடற்கரைப் பிரதேசத்திற்கு விஜயம் மேற்கொண்டனர். இந்த விஜயம் சாதாரண சுற்றுலாப் பயணமாக மட்டுமன்றி, அப்பகுதி மக்கள் எதிர்நோக்கும் ஒரு முக்கியமான சுற்றுச்சூழல் மற்றும் சமூகப் பிரச்சினையை நேரில் அவதானிக்கும் ஊடகப் பயணமாகவும் அமைந்தது.

குறிப்பாக சாய்ந்தமருது கடற்கரைப் பகுதியில் இடம்பெற்று வரும் கடலரிப்பு நிலைமையினை ஊடகவியலாளர்கள் மற்றும் காத்தான்குடி மீடியா போரத்தின் உறுப்பினர்கள் நேரடியாக பார்வையிட்டனர். கடலோரப் பகுதிகளில் ஏற்பட்டுள்ள மாற்றங்கள் மற்றும் கடற்பகுதி கரையை நெருங்கி வரும் நிலைமைகள் தொடர்பில் அவர்கள் அவதானம் செலுத்தினர்.

கடலரிப்பினால் கடற்கரைப் பகுதிகளில் வசிக்கும் மக்கள் மற்றும் மீனவ சமூகத்தினர் எதிர்நோக்கக்கூடிய பாதிப்புகள் தொடர்பிலும் உறுப்பினர்கள் கவனம் செலுத்தினர். கடலரிப்பு என்பது வெறுமனே இயற்கைச் சம்பவம் மட்டுமல்லாது, மக்களின் வாழ்வாதாரம், பாதுகாப்பு மற்றும் எதிர்கால குடியிருப்பு நிலைமைகளையும் பாதிக்கக்கூடிய ஒரு முக்கிய விடயமாகும்.

குறிப்பாக கடலோரப் பகுதிகளில் ஏற்படும் சுற்றுச்சூழல் மாற்றங்கள் தொடர்பில் தொடர்ச்சியான ஊடக கவனம் அவசியம் என உறுப்பினர்கள் கருத்து தெரிவித்தனர். பிரச்சினை ஏற்பட்ட பின்னர் செய்தி வெளியிடுவதற்குப் பதிலாக, முன்னெச்சரிக்கை மற்றும் விழிப்புணர்வு அடிப்படையிலான ஊடக செயற்பாடுகள் மேற்கொள்ளப்பட வேண்டியதன் அவசியமும் இதன்போது எடுத்துரைக்கப்பட்டது.

சாய்ந்தமருது கடற்கரையில் மேற்கொள்ளப்பட்ட இந்த நேரடி கள ஆய்வு, ஊடகவியலாளர்களுக்கு ஒரு முக்கியமான அனுபவமாக அமைந்தது. செய்திகளை அலுவலகங்களில் இருந்து மட்டுமே தயாரிக்காமல், சம்பவ இடங்களுக்குச் சென்று மக்களின் உண்மையான நிலைமைகளை அறிந்து செய்தி சேகரிப்பதன் முக்கியத்துவத்தை இது மீண்டும் உணர்த்தியது.

கடலரிப்பு மற்றும் கடலோர மக்களின் பிரச்சினைகள் தொடர்பான தகவல்களை எதிர்காலத்தில் பொறுப்பான முறையில் வெளிக்கொணர வேண்டும் என்ற கருத்தும் உறுப்பினர்களிடையே இடம்பெற்ற கலந்துரையாடல்களில் முன்வைக்கப்பட்டது.

சாய்ந்தமருது கடற்கரைப் பகுதிக்கான கள விஜயத்தைத் தொடர்ந்து உறுப்பினர்கள் மருதமுனை கடற்கரைத் திடலுக்கு சென்றனர். அங்கு சிலோன் மீடியா போரத்தின் ஏற்பாட்டில் சிநேகபூர்வ சந்திப்பொன்று இடம்பெற்றது.

சிலோன் மீடியா போரத்தின் தலைவர் ரியாத் மஜீட் தலைமையில் இடம்பெற்ற இச்சந்திப்பில், காத்தான்குடி மீடியா போரம் மற்றும் சிலோன் மீடியா போரம் ஆகிய இரு ஊடக அமைப்புகளின் உறுப்பினர்களும் கலந்துகொண்டனர்.

இரு அமைப்புகளுக்கிடையிலான நட்புறவை மேலும் வலுப்படுத்துதல், எதிர்காலத்தில் இணைந்து ஊடக மற்றும் சமூக செயற்பாடுகளை முன்னெடுத்தல், இளம் ஊடகவியலாளர்களுக்கு வழிகாட்டுதல் மற்றும் ஊடகத்துறையின் எதிர்கால சவால்களை எதிர்கொள்ளுதல் உள்ளிட்ட பல்வேறு விடயங்கள் தொடர்பில் கருத்துப் பரிமாற்றங்கள் இடம்பெற்றன.

சமூகப் பொறுப்புணர்வுடன் கூடிய ஊடக செயற்பாடுகள் இன்றைய காலத்தின் முக்கிய தேவையாகும் என்பதுடன், மக்களின் பிரச்சினைகளை உரிய முறையில் வெளிக்கொணர்வதில் சுயாதீன மற்றும் பொறுப்பான ஊடகவியலின் பங்கு தொடர்பிலும் இதன்போது கலந்துரையாடப்பட்டது.

இச்சந்திப்பின் நினைவாக காத்தான்குடி மீடியா போரத்தின் சார்பில் சிலோன் மீடியா போரத்திற்கு நினைவுச் சின்னம் வழங்கி கௌரவிக்கப்பட்டது. இரு அமைப்புகளுக்கிடையிலான நட்புறவையும் எதிர்கால ஒத்துழைப்பையும் பிரதிபலிக்கும் நிகழ்வாக இது அமைந்தது.

இவ்வுத்தியோகபூர்வ கள விஜயத்தில் காத்தான்குடி மீடியா போரத்தின் ஆயுட்காலத் தலைவர் மௌலவி எஸ்.எம்.எம்.முஸ்தபா (பலாஹி), செயலாளர் எம்.ஐ.அப்துல் நஸார், உறுப்பினர்களான எம்.ஐ.அப்துல் மஜீத், மௌலவி என்.எம்.எம்.நௌபர் எம்.ரீ.எம்.யூனுஸ், பீ.எம்.பயாஸ், எம்.எம்.எம்.அஸீம், எம்.என்.எம்.றுஸ்த் உள்ளிட்ட உறுப்பினர்களும், சிலோன் மீடியா போரத்தின் உறுப்பினர்களும் கலந்துகொண்டனர். இயற்கை அனுபவம், ஊடக அனுபவப் பகிர்வு, சாய்ந்தமருது கடற்கரையில் கடலரிப்பை நேரில் சென்று பார்வையிடுதல் மற்றும் இரு ஊடக அமைப்புகளுக்கிடையிலான நட்புறவை வலுப்படுத்துதல் ஆகிய பல்வேறு அம்சங்களை உள்ளடக்கிய இந்தப் பயணம், காத்தான்குடி மீடியா போரத்தின் உறுப்பினர்களுக்கு மறக்கமுடியாததும் பயனுள்ளதுமான ஒரு கள அனுபவமாக அமைந்தது.