அபுதாபியிலிருந்து நாடு கடத்தப்பட்ட சந்தேகநபர்கள் இருவர் கட்டுநாயக்க விமான நிலையத்தில் கைது; மேலதிக விசாரணை ஆரம்பம்.!!!

போதைப்பொருள், சட்டவிரோத துப்பாக்கி வைத்திருந்தமை மற்றும் ஒழுங்கமைக்கப்பட்ட குற்றச்செயல்கள் தொடர்பில் இலங்கையில் தேடப்பட்டு வந்ததாகக் கூறப்படும் இருவர், ஐக்கிய அரபு இராச்சியத்திலிருந்து இலங்கைக்கு நாடு கடத்தப்பட்ட பின்னர் கட்டுநாயக்க விமான நிலையத்தில் கைது செய்யப்பட்டுள்ளனர்.

இவர்கள் அபுதாபியிலிருந்து Etihad Airways விமானம் மூலம் இன்று (03) காலை 10.15 மணியளவில் கட்டுநாயக்க பண்டாரநாயக்க சர்வதேச விமான நிலையத்தை வந்தடைந்துள்ளனர்.

இதன்போது, குற்றப் புலனாய்வுத் திணைக்கள அதிகாரிகள் இருவரையும் கைது செய்து, வாக்குமூலங்களைப் பதிவு செய்துள்ளனர்.

கைது செய்யப்பட்டவர்களில் 37 வயதான பந்துல திசாநாயக்க, போதைப்பொருள் மற்றும் சட்டவிரோத துப்பாக்கிகளை வைத்திருந்ததாகக் கூறப்படும் குற்றச்சாட்டுகள் தொடர்பில் தேடப்பட்டு வந்தவர் என தெரிவிக்கப்பட்டுள்ளது.

மற்றைய சந்தேகநபரான 36 வயதான ஹர்ஷ குமார, ஒழுங்கமைக்கப்பட்ட குற்றச்செயல்களுடன் தொடர்புடையதாகக் கூறப்படும் நபரின் நெருங்கிய ஆதரவாளராகவும், பூஸ்ஸ சிறைச்சாலையில் இடம்பெற்றதாகக் கூறப்படும் அமைதியின்மை சம்பவத்துடன் தொடர்புடையவராகவும் தெரிவிக்கப்பட்டுள்ளது.

அத்துடன், ஐக்கிய அரபு இராச்சியத்தில் தடுத்து வைக்கப்பட்டிருந்த காலப்பகுதியில், ஈரான் மேற்கொண்ட தாக்குதல்களுடன் தொடர்புடைய ட்ரோன்கள் மற்றும் ஏவுகணைகள் உள்ளிட்ட காட்சிகள் அவர்களது கையடக்கத் தொலைபேசிகளில் சேமித்து வைக்கப்பட்டிருந்ததாகவும் தெரிவிக்கப்பட்டுள்ளது.

வாக்குமூலங்கள் பதிவு செய்யப்பட்டதன் பின்னர், பந்துல திசாநாயக்க கொழும்பு பயங்கரவாத விசாரணைப் பிரிவிற்கும், ஹர்ஷ குமார கொழும்பு தெற்கு குற்றப் புலனாய்வுப் பிரிவிற்கும் மேலதிக விசாரணைகளுக்காக அழைத்துச் செல்லப்பட்டுள்ளனர்.

சம்பவம் தொடர்பான மேலதிக விசாரணைகள் முன்னெடுக்கப்பட்டு வருகின்றன.