ஓமானில் ஈரான்–அமெரிக்கா அணுசக்தி பேச்சுவார்த்தை: ஒப்பந்த நம்பிக்கையுடன் மீண்டும் மேசைக்கு.!!!

ஈரான் மற்றும் அமெரிக்கா இடையிலான அணுசக்தி தொடர்பான உயர்மட்ட பேச்சுவார்த்தை ஓமானின் மஸ்கட் நகரில் நேற்று வெள்ளிக்கிழமை நடைபெற்றது. கடந்த ஜூன் மாதத்தில் இரு நாடுகளுக்கும் இடையே ஏற்பட்ட மோதலுக்குப் பிறகு இடம்பெற்ற முதலாவது நேரடி/மறைமுக பேச்சுவார்த்தை இதுவாகும். ஓமான் அரசு நடுவர் பங்காற்றிய இந்த சந்திப்பு, பிராந்தியத்தில் உயர்ந்த பதற்றநிலையில் நடைபெற்றது.

பேச்சுவார்த்தை குறித்து முக்கிய அம்சங்கள்:

“சிறந்த ஆரம்பம்” – ஈரான்:

ஈரான் வெளியுறவு அமைச்சர் அப்பாஸ் அரக்சி, இந்த பேச்சுவார்த்தையை “ஒரு சிறந்த ஆரம்பம்” என வர்ணித்தார். இருப்பினும், இரு நாடுகளுக்கும் இடையே நீடிக்கும் ஆழமான அவநம்பிக்கை முக்கிய சவாலாக இருப்பதாகவும் அவர் குறிப்பிட்டார்.

அமெரிக்க தரப்பு பங்கேற்பு:

அமெரிக்க ஜனாதிபதி டொனால்ட் டிரம்பின் விசேட தூதர் ஸ்டீவ் விட்காஃப், ஜாரெட் குஷ்னர் ஆகியோர் பேச்சுவார்த்தையில் பங்கேற்றனர். மேலும், அமெரிக்க மத்திய கட்டளைத் தளபதி (CENTCOM) அட்மிரல் பிராட் கூப்பர் கலந்துகொண்டது குறிப்பிடத்தக்கதாக அமைந்தது. இது, இராணுவ அழுத்தத்துடன் கூடிய தூதரக முயற்சி என அரசியல் விமர்சகர்கள் கருத்துத் தெரிவித்துள்ளனர்.

நிகழ்ச்சி நிரல் தொடர்பான முரண்பாடு:

ஈரான் தனது அணுசக்தி திட்டம் குறித்தே பேச்சுவார்த்தை நடத்த விரும்புவதாகத் தெரிவித்துள்ளது. ஆனால், ஈரானின் ஏவுகணைத் திட்டம் மற்றும் பிராந்திய ஆயுத ஆதரவு குழுக்கள் தொடர்பான விடயங்களும் பேச்சுவார்த்தையில் சேர்க்கப்பட வேண்டும் என அமெரிக்கா வலியுறுத்தி வருகிறது. இந்த விடயத்தில் இரு தரப்புக்கும் இடையே கருத்து வேறுபாடு நீடிக்கிறது.

டிரம்பின் எச்சரிக்கை – அடுத்தகட்ட பேச்சு:

அணுசக்தி ஒப்பந்தம் எட்டப்படாவிட்டால் கடும் விளைவுகளை எதிர்கொள்ள நேரிடும் என அமெரிக்க ஜனாதிபதி டொனால்ட் டிரம்ப் எச்சரிக்கை விடுத்துள்ளார். இதனிடையே, அடுத்தகட்ட பேச்சுவார்த்தை வரும் வாரத்தில் மீண்டும் நடைபெறும் என எதிர்பார்க்கப்படுகிறது.

இந்த பேச்சுவார்த்தை, மத்திய கிழக்கு பிராந்தியத்தில் போர் அபாயம் அதிகரித்துள்ள நிலையில், ஒரு முக்கியமான தூதரக முன்னேற்றமாகக் கருதப்படுகின்றது. இருப்பினும், முக்கிய விவகாரங்களில் உடன்பாடு எட்டப்படுமா என்பது இன்னும் தெளிவாகவில்லை.