இலங்கையின் 80ஆவது பட்ஜெட்; சொல்லும் செய்தி என்ன???

இலங்கையின் 80ஆவது வரவு–செலவுத் திட்டம் 2026 சமீபத்தில் பாராளுமன்றத்தில் சமர்ப்பிக்கப்பட்டது. ஜனாதிபதி அனுர் குமார திசாநாயக்க நிதி, திட்டமிடல் மற்றும் பொருளாதார அபிவிருத்தி அமைச்சராக இத்திட்டத்தை முன்வைத்துள்ளார்.

இந்த பட்ஜெட்டில், மக்களின் வாழ்க்கை தரத்தை உயர்த்தும் நோக்கில் பல புதிய திட்டங்களும், ஒதுக்கீடுகளும் இடம்பெற்றுள்ளன. அத்தோடு கல்வி, சுகாதாரம், விவசாயம், தொழில் துறை, இளைஞர் முன்னேற்றம் மற்றும் வறுமை ஒழிப்பு ஆகிய துறைகளை முன்னுரிமையாகக் கொண்டு வடிவமைக்கப்பட்டதாக அரசு குறிப்பிடுகின்றது.

பொருளாதார மீட்சிக்கான திட்டங்களாக நாட்டின் கடன் சுமை, விலை உயர்வு மற்றும் நிதிப் பற்றாக்குறை ஆகிய சவால்களை எதிர்கொள்ளும் நிலையில், அரசு பல முக்கியமான நிதி மறுசீரமைப்பு நடவடிக்கைகளை இந்த பட்ஜெட்டில் அறிவித்துள்ளது.

பொருளாதார வளர்ச்சியை ஊக்குவிக்கும் நோக்கில் முதலீட்டாளர்களுக்கு புதிய ஊக்கங்கள், சிறு மற்றும் நடுத்தர தொழில்களுக்கான நிதி உதவிகள், மேலும் வெளிநாட்டு முதலீட்டை ஈர்க்கும் சட்ட மாற்றங்கள் மேற்கொள்ளப்பட உள்ளதாக குறிப்பிடுகின்றது.

மக்கள் நலனுக்கான திட்டங்களாக குறைந்த வருமானக் குடும்பங்களுக்கு புதிய உதவித் திட்டங்கள், முதியோர்கள், மாற்றுத்திறனாளிகள், விதவைகள் ஆகியோருக்கான மாதாந்திர நிதி உதவி, விவசாயிகளுக்கான உற்பத்தி ஊக்கத்தொகை, தோட்டத் தொழிலாளர்களின் தினசரி ஊதியம் ரூ.1750 ஆக உயர்த்தல், வெளிநாட்டில் பணிபுரியும் இலங்கையர்களுக்கான குறைந்த வட்டி வீட்டுக் கடன் திட்டம் ஆகியவை இதில் இடம்பெற்றுள்ளன.

அடித்தள மேம்பாடு திட்டங்களாக அரசாங்கம் 2026க்குள் முதன்மை சாலை வலையமைப்புகள், மின்-நீர் வசதிகள் மற்றும் மீன்பிடி துறைமுகங்கள் ஆகியவற்றை மேம்படுத்த ரூ.50 பில்லியன் ஒதுக்கியுள்ளது. மேலும், டிஜிட்டல் தேசிய அடையாள அட்டை திட்டம் மார்ச் 2026க்குள் நிறைவுபெறும் என ஜனாதிபதி தெரிவித்துள்ளார். இது அரசு சேவைகள் மற்றும் சமூக நலன்களை வழங்கும் முறையில் மாற்றத்தை ஏற்படுத்தும் என்கின்றனர் அவதானிப்பாளர்கள்.

கல்வித்துறையில் புதிய தொழில்நுட்ப பாடத்திட்டங்கள், டிஜிட்டல் கற்றல் வசதிகள் மற்றும் ஆசிரியர் பயிற்சி மையங்கள் உருவாக்கப்பட உள்ளதாக தெரிவிக்கப்பட்டுள்ளது.

அத்தோடு சுகாதாரத் துறையில் மாவட்ட மருத்துவமனைகள் புதுப்பித்தல், மருந்து உற்பத்தி ஊக்குவிப்பு மற்றும் பொதுச் சுகாதார சேவைகளுக்கான நிதி ஒதுக்கீடுகள் ஒதுக்கப்பட்டுள்ளமை குறிப்பிடத்தக்கது.

ஆனால், விமர்சகர்கள் சில முக்கிய அம்சங்களில் சந்தேகங்களை வெளிப்படுத்துகிறார்கள். அரசு கூறும் புதிய திட்டங்கள் மற்றும் ஒதுக்கீடுகள் நிறைவேற்றல் முன்னேற்றம் மற்றும் பின்விளைவுகள் குறித்து தெளிவான விவரங்களை அளிக்கவில்லை எனவும், சில நிதி மறுசீரமைப்பு நடவடிக்கைகள் தனியார் மற்றும் வெளிநாட்டு முதலீட்டாளர்களுக்கு எதிர்பார்த்த விளைவுகளை தருமா என்பது சந்தேகம் எனவும் அவர்கள் தெரிவித்துள்ளனர்.

பொதுச் சமூக நலன் – சாதனைகள் மற்றும் கேள்விகளாக;

வெளிநாட்டு இலங்கை ஊழியர்களுக்கான குறைந்த வட்டி வீட்டு வசதி திட்டம் மற்றும் பங்களிப்பு ஓய்வூதிய திட்டம் – மக்கள் வாழ்வில் மாற்றத்தை ஏற்படுத்துமா என்பது சந்தேகம்.

தோட்டத் தொழிலாளர்களின் தினசரி சம்பளம் ரூ.1750 ஆக உயர்த்தப்பட்டது. இது நலனாகும் என்றாலும், பிற தொழிலாளர் குழுக்களுக்கு எதிரான சமநிலையை ஏற்படுத்தும் அபாயம் உள்ளது.

விவசாயிகளுக்கான களஞ்சிய சாலைகளுக்கான ரூ.350 மில்லியன் ஒதுக்கீடு – நிலையான செயலாக்கம் இல்லாவிடில், திட்டத்தின் பயன் குறைந்துவிடும்.

பொருளாதார மீட்சிக்கான நடவடிக்கைகள் – விமர்சனங்களாக;

கடன் சுமை, விலை உயர்வு மற்றும் நிதி பற்றாக்குறை பிரச்சினைகளை எதிர்கொள்ள அரசு பல நிதி மறுசீரமைப்பு நடவடிக்கைகளை அறிவித்துள்ளது.

முதலீட்டாளர்களுக்கு புதிய ஊக்கங்கள், சிறு மற்றும் நடுத்தர தொழில்களுக்கு நிதி உதவிகள் அறிவிக்கப்பட்டாலும், நிர்வாக நடைமுறைகள் தெளிவாகக் கூறப்படவில்லை, அதனால் சந்தேகம் அதிகரிக்கிறது.

வெளிநாட்டு முதலீட்டை ஈர்க்கும் சட்ட மாற்றங்கள் – சட்ட நடைமுறை மற்றும் செயலாக்கத்தில் தாமதங்கள் ஏற்பட்டால் எதிர்பார்த்த விளைவுகள் வராமலும் இருக்கலாம்.

அடித்தள மேம்பாடு மற்றும் சமூக திட்டங்களில்;

முதன்மை சாலை வலையமைப்புகள், மின்–நீர் வசதிகள் மற்றும் மீன்பிடித் துறைமுக மேம்பாடு – ரூ.50 பில்லியன் ஒதுக்கீடு.

டிஜிட்டல் தேசிய அடையாள அட்டை திட்டம் மார்ச் 2026க்குள் நிறைவு பெறும் என்று கூறப்பட்டுள்ளது. ஆனால், நாடு முழுவதும் செயல்படுத்தும் திறன், டிஜிட்டல் உட்கட்டமைப்புகளின் பாதுகாப்பு மற்றும் பயனர் விழிப்புணர்வு போன்ற விஷயங்கள் சந்தேகத்திற்கு உள்ளாகும்.

கல்வி மற்றும் சுகாதாரம் வாய்ப்புகள் மற்றும் சவால்களாக;

கல்வியில் புதிய தொழில்நுட்ப பாடத்திட்டங்கள், டிஜிட்டல் கற்றல் வசதிகள், ஆசிரியர் பயிற்சி மையங்கள் உருவாக்கப்பட உள்ளன.

மாவட்ட மருத்துவமனைகள் புதுப்பித்தல், மருந்து உற்பத்தி ஊக்குவிப்பு மற்றும் பொது சுகாதார சேவைகளுக்கான நிதி ஒதுக்கீடு.

இருப்பினும், நிதி ஒதுக்கீடுகள் நேர்மையாக மற்றும் முழுமையாக பயன்படுத்தப்படுமா என்பது செயல்திறனின் முக்கியமான பகுதி என விமர்சகர்கள் வலியுறுத்துகிறார்கள்.

மக்கள் எதிர்பார்த்ததைப் போல இந்த பட்ஜெட்டில் அனைத்து துறைகளுக்கும் சமநிலை பேணப்பட்டுள்ளது என்றாலும், அதன் நடைமுறைப்படுத்தலே முக்கியம். நிதி ஒதுக்கீடுகள் நியாயமான முறையில் பயன்படுத்தப்பட்டால் மட்டுமே நாட்டின் பொருளாதாரம் மீண்டு எழும்.

பல திட்டங்கள் அதிக எதிர்பார்ப்பை உருவாக்கினாலும், நடைமுறை அமுலாக்கம் வெளிப்படையான பரிசீலனையைத் தோற்றுவித்துள்ளது.

நிதி மற்றும் கட்டமைப்பு மாற்றங்களின் வியாபார, சமூக மற்றும் பொது வாழ்க்கை மீதான தாக்கம் எதிர்காலம் வரைக்கும் கணிக்கப்பட வேண்டியது அவசியம்.

“மக்களின் நலனே நாட்டின் செழிப்பு” என்ற கொள்கையுடன் உருவாக்கப்பட்ட 2026 பட்ஜெட், இலங்கையின் பொருளாதார மீட்சிக்கும் சமூக நலனுக்கும் புதிய திசையைத் திறக்கக்கூடும்.

ஆனால், நிகழ்த்தும் நடவடிக்கைகளின் திறன், நிதி ஒதுக்கீடுகளின் நியாயமான பயன்பாடு மற்றும் அரசு–மக்கள் ஒற்றுமை முயற்சிகள் மட்டுமே இதன் விளைவுகளை உண்மையில் உணர்த்தும்.

-எம்.ரி.எம்-