பஹ்ரைனில் திறமையான இலங்கை தொழிலாளர்களுக்கு சிறந்த வேலை வாய்ப்புகள்; கோசல விக்ரமசிங்க தகவல்.!!!
பஹ்ரைனில் திறமையான தொழிலாளர்களுக்கு நம்பிக்கைக்குரிய வேலை வாய்ப்புகள் உள்ளன என்று இலங்கை வெளிநாட்டு வேலைவாய்ப்பு பணியகத்தின் (SLBFE) தலைவர் கோசல விக்ரமசிங்க தெரிவித்தார்.
பஹ்ரைனில் இயங்கும் உரிமம் பெற்ற ஆட்சேர்ப்பு முகவர் நிறுவனங்களின் பிரதிநிதிகளுடன் பஹ்ரைனில் நடைபெற்ற கலந்துரையாடல் அமர்வில் பங்கேற்றபோது அவர் இந்த கருத்துக்களைத் தெரிவித்தார்.
இந்த அமர்வை பஹ்ரைனில் உள்ள இலங்கை தூதரகம் ஏற்பாடு செய்திருந்தது.
தற்போது பஹ்ரைன் இராச்சியத்திற்கு உத்தியோகபூர்வ விஜயம் மேற்கொண்டுள்ள தலைவர் விக்ரமசிங்க, தொழிலாளர் இடம்பெயர்வு தொடர்பான இருதரப்பு ஒத்துழைப்பை மேலும் வலுப்படுத்துவதற்கும், இலங்கை புலம்பெயர்ந்தோரின் நலன் மற்றும் பாதுகாப்பை மேம்படுத்துவதற்கும் பஹ்ரைன் அதிகாரிகளுடன் பேச்சுவார்த்தை நடத்தினார்.
வெளிநாடுகளில் பணிபுரியும் இலங்கையர்களின் உரிமைகளையும் கௌரவத்தையும் பாதுகாப்பதில் தனது அர்ப்பணிப்பை வலியுறுத்திய SLBFE தலைவர், பஹ்ரைனை தளமாகக் கொண்ட ஆட்சேர்ப்பு முகவர் நிறுவனங்களின் தொடர்ச்சியான ஆதரவையும் தீவிர ஈடுபாட்டையும் பாராட்டினார்.
கூட்டத்தில் உரையாற்றிய பஹ்ரைனுக்கான இலங்கை தூதுவர் திருமதி ஷானிகா திஸாநாயக்க, இலங்கையின் திறமையான தொழிலாளர் படையை விரிவுபடுத்துவதற்கும் வெளிநாட்டு வேலை வாய்ப்புகளை அதிகரிப்பதற்கும் அரசாங்கத்தின் பரந்த முன்முயற்சியுடன் இணைந்து திறமையான தொழிலாளர்களை ஆட்சேர்ப்பு செய்வதன் முக்கியத்துவத்தை எடுத்துரைத்தார்.
