‘காவந்திஸ்ஸ’ யானையின் மரணம் தொடர்பில் விசாரணை: நிபுணர் குழு முதன்முறையாகக் கூடியது.!!!

• யானையின் இறப்புக்கான காரணத்தைக் கண்டறியவும், காட்டு யானைகளைப் பாதுகாப்பதற்கான தேசிய வேலைத்திட்டத்தைத் தயாரிக்கவும் நடவடிக்கை.

‘காவந்திஸ்ஸ’ யானையின் மரணம் தொடர்பில் விசாரணைகளை மேற்கொள்வதற்கும், காட்டு யானைகளைப் பாதுகாப்பதற்கான தேசிய வேலைத்திட்டம் தொடர்பில் பரிந்துரைகளை முன்வைப்பதற்கும் நியமிக்கப்பட்ட நிபுணர் குழுவின் முதலாவது கூட்டம் இன்று (21) முற்பகல் ஜனாதிபதி அலுவலகத்தில் நடைபெற்றது.

ஜனாதிபதியின் பணிக்குழாம் பிரதானி பிரபாத் சந்திரகீர்த்தி தலைமையில் நடைபெற்ற இக்கூட்டத்தில், யானையின் மரணம் தொடர்பான விசாரணைகள் மற்றும் எதிர்காலத்தில் இவ்வாறான சம்பவங்களைத் தடுப்பதற்கான நடவடிக்கைகள் குறித்து விரிவாகக் கலந்துரையாடப்பட்டது.

2026 ஒக்டோபர் 16ஆம் திகதி அல்லது அதனை அண்மித்த காலப்பகுதியில், கல்கமுவ, சியம்பலங்கமுவ பகுதியில் ‘காவந்திஸ்ஸ’ யானை உயிரிழந்த சம்பவம் தொடர்பில் விசாரணைகளை முன்னெடுத்தல், காட்டு யானைகளின் நலனை உறுதிப்படுத்துவதற்கான உரிய செயற்பாட்டு நடைமுறைகளைத் தயாரித்தல் மற்றும் யானைகளைப் பாதுகாப்பதற்கான தேசிய வேலைத்திட்டம் தொடர்பில் பரிந்துரைகளை வழங்குதல் ஆகிய நோக்கங்களுக்காக ஜனாதிபதி அநுர குமார திசாநாயக்கவினால் இந்நிபுணர் குழு நியமிக்கப்பட்டிருந்தது.

யானையின் மரணம் தொடர்பில் விரிவான ஆராய்வு

கூட்டத்தின்போது, ‘காவந்திஸ்ஸ’ யானையின் மரணத்திற்கான காரணம், யானைக்கு ஏற்பட்ட பாதிப்புகள் மற்றும் வனஜீவராசிகள் பாதுகாப்புத் திணைக்களத்தின் தலையீடு உள்ளிட்ட பல்வேறு விடயங்கள் விரிவாக ஆராயப்பட்டன.

இவ்வாறான சம்பவங்கள் எதிர்காலத்தில் இடம்பெறும்போது உடனடியாக முன்னெடுக்க வேண்டிய நடவடிக்கைகளைத் தீர்மானிப்பதற்காக விஞ்ஞான ரீதியான நடைமுறையொன்றைத் தயாரிப்பதன் அவசியமும் இதன்போது வலியுறுத்தப்பட்டது.

அவசர கால்நடை மருத்துவப் பிரிவை நிறுவத் திட்டம்

காயமடையும் அல்லது ஆபத்தான நிலையில் காணப்படும் காட்டு யானைகளுக்கு விரைவாகச் சிகிச்சை வழங்கும் நோக்கில், களத்தில் உடனடியாகச் செயற்படக்கூடிய அவசர சிகிச்சை கால்நடை மருத்துவப் பிரிவொன்றை (Rapid Response Veterinary Unit) நிறுவுவது தொடர்பிலும் கலந்துரையாடப்பட்டது.

மேலும், யானைகளைப் பாதுகாப்பதற்கான நடவடிக்கைகளை வலுப்படுத்தும் வகையில் உள்நாட்டு மற்றும் வெளிநாட்டு நிபுணர்களின் உதவியைப் பெற்றுக்கொள்வது குறித்தும் தீர்மானிக்கப்பட்டது.

நிபுணர் குழுவில் பங்கேற்றவர்கள்

இக்கூட்டத்தில் நிபுணர் குழுவின் ஒருங்கிணைப்பாளரும் ஜனாதிபதியின் மேலதிக செயலாளருமான டபிள்யூ. டபிள்யூ. ஹெரிசன், நிபுணர் குழுவின் தலைவரும் முன்னாள் அமைச்சின் செயலாளருமான ஏ. எச். சரத் விஜேசிங்க உள்ளிட்டோர் கலந்துகொண்டனர்.

அத்துடன், பேராசிரியர் டீ. சமிந்த பெர்னாண்டோ, பேராசிரியர் பீ. ஜீ. அனில் புஷ்பகுமார, பேராசிரியர் யூ. கே. காலிங்க பத்மலால், கலாநிதி ஜகத் குணவர்தன மற்றும் சட்டத்தரணி சரக்க ஜயரத்ன ஆகியோரும் இக்கூட்டத்தில் பங்கேற்றனர்.

காட்டு யானைகளின் பாதுகாப்பை உறுதிப்படுத்துவதற்கும், எதிர்காலத்தில் இவ்வாறான உயிரிழப்புகளைத் தவிர்ப்பதற்கான நடைமுறைகளை வலுப்படுத்துவதற்கும் இந்நிபுணர் குழுவின் பரிந்துரைகள் முக்கியத்துவம் பெறும் என எதிர்பார்க்கப்படுகிறது.