உச்ச நீதிமன்றத் தீர்ப்பை அரசாங்கம் புறக்கணிக்க முடியாது – ஞானசார தேரர் விவகாரத்தில் அமைச்சர் விளக்கம்.!!!
ஞானசார தேரருக்கு எதிராக உச்ச நீதிமன்றம் வழங்கிய தீர்ப்புக்கு முரணாக அரசாங்கத்தால் செயற்பட முடியாது என அமைச்சரவைப் பேச்சாளரும் அமைச்சருமான நளிந்த ஜயதிஸ்ஸ தெரிவித்துள்ளார்.
இன்று (20) நடைபெற்ற வாராந்த அமைச்சரவை ஊடகவியலாளர் சந்திப்பில் கருத்துத் தெரிவிக்கும்போதே அவர் இதனைக் குறிப்பிட்டுள்ளார்.
சிறையில் அடைக்கப்பட்டுள்ள ஞானசார தேரருக்கு தற்போதைய அரசாங்கத்தினால் ஏன் ஜனாதிபதி பொதுமன்னிப்பு வழங்க முடியாது என ஊடகவியலாளர் ஒருவர் எழுப்பிய கேள்விக்குப் பதிலளித்த அமைச்சர், நீதிமன்ற நடவடிக்கைகளின் பின்னரே அவருக்குத் தண்டனை வழங்கப்பட்டுள்ளதாகத் தெரிவித்தார்.
எனவே, உச்ச நீதிமன்றம் வழங்கிய தீர்ப்பைப் புறக்கணித்து அரசாங்கத்தால் செயற்பட முடியாது என அவர் வலியுறுத்தினார்.
ஒருவரின் அந்தஸ்து, பதவி அல்லது அதிகாரம் எதுவாக இருந்தாலும், நாட்டில் சட்டம் எவ்வித விதிவிலக்குகளுமின்றி நடைமுறைப்படுத்தப்பட வேண்டும் என்றும் அமைச்சர் குறிப்பிட்டார்.
மேலும், தற்போதைய அரசாங்கத்திற்கு வாக்களிக்காதவர்கள்கூட, தனிநபர்களின் அந்தஸ்து அல்லது செல்வாக்கைப் பொருட்படுத்தாமல் சட்டம் அனைவருக்கும் சமமாக நடைமுறைப்படுத்தப்பட வேண்டும் என்றே எதிர்பார்ப்பதாக அவர் சுட்டிக்காட்டினார்.
சட்டத்தின் ஆட்சியைப் பாதுகாப்பதும், அனைவருக்கும் சமமான முறையில் சட்டத்தை நடைமுறைப்படுத்துவதும் அரசாங்கத்தின் பொறுப்பு என அமைச்சர் ஜயதிஸ்ஸ மேலும் தெரிவித்தார்.
