சாலை விதிமீறல்களைக் கட்டுப்படுத்த இலங்கையில் புதிய திட்டம்: ஓட்டுநர் உரிமத்துக்கு புள்ளி முறை.!!!

• போக்குவரத்து விதிமீறல்களுக்கு ஏற்ப புள்ளிகள் வழங்கப்படும் – ஓராண்டு வரை உரிமம் இடைநிறுத்தப்படலாம்.

இலங்கையில் போக்குவரத்து விதிமுறைகளைத் தொடர்ந்து மீறும் வாகன ஓட்டுநர்களைக் கட்டுப்படுத்தும் நோக்கில், புதிய ஓட்டுநர் உரிமத் தவறுப் புள்ளிகள் முறை அறிமுகப்படுத்தப்படவுள்ளதாகப் போக்குவரத்து, நெடுஞ்சாலைகள் மற்றும் நகர்ப்புற மேம்பாட்டு அமைச்சர் பிமல் ரத்நாயக்க தெரிவித்துள்ளார்.

அண்மையில் நடைபெற்ற நாடாளுமன்ற அமைச்சரவைக் ஆலோசனைக் குழுக் கூட்டத்தில் உரையாற்றிய அவர், இந்த முறை ஆறு மாத கால சோதனைத் திட்டமாக முன்னெடுக்கப்படுவதாகவும், 2027 மார்ச் 31ஆம் திகதி வரை நடைமுறையில் இருக்கும் எனவும் குறிப்பிட்டார்.

முன்மொழியப்பட்டுள்ள புதிய நடைமுறையின் கீழ், வாகன ஓட்டுநர்கள் மேற்கொள்ளும் போக்குவரத்து விதிமீறல்களின் தன்மை மற்றும் தீவிரத்தன்மைக்கு ஏற்ப அவர்களது ஓட்டுநர் பதிவேட்டில் தவறுப் புள்ளிகள் சேர்க்கப்படும்.

ஒரு வாகன ஓட்டுநர் மொத்தமாக 30 தவறுப் புள்ளிகளைப் பெற்றவுடன், அவரது ஓட்டுநர் உரிமத்தைத் தற்காலிகமாக இடைநிறுத்தும் நடவடிக்கை தானியங்கி முறையில் மேற்கொள்ளப்படும் எனத் தெரிவிக்கப்பட்டுள்ளது.

ஓராண்டு வரை ஓட்டுநர் உரிமம் இடைநிறுத்தம்

இவ்வாறு உரிமம் இடைநிறுத்தப்படும் ஓட்டுநர்கள், தங்களது ஓட்டுநர் உரிமத்தை அருகிலுள்ள பொலிஸ் நிலையத்தில் ஒப்படைக்க வேண்டும்.

பொதுவாக, உரிமம் இடைநிறுத்தப்படும் காலம் ஓராண்டாக இருக்கும். எனினும், பரிந்துரைக்கப்பட்ட பயிற்சித் திட்டங்களை வெற்றிகரமாக நிறைவு செய்யும் ஓட்டுநர்களுக்கு, இந்தக் காலத்தை மூன்று மாதங்களாகக் குறைத்துக்கொள்ள வாய்ப்பு வழங்கப்படும் என முன்மொழியப்பட்டுள்ளது.

மேலும், போக்குவரத்து விதிமீறல்களுக்காக அபராதம் செலுத்தும் ஓட்டுநர்களுக்கு, அவர்களது விதிமீறல்களுடன் தொடர்புடைய தவறுப் புள்ளிகள் குறித்த தகவல்கள் குறுஞ்செய்தி (SMS) மூலம் அறிவிக்கப்படும்.

சாலைப் பாதுகாப்பை மேம்படுத்துவதே நோக்கம்

இந்தப் புதிய திட்டம் வாகன ஓட்டுநர்களை அச்சுறுத்துவதற்காக அறிமுகப்படுத்தப்படவில்லை எனத் தெரிவித்த அமைச்சர், போக்குவரத்து விதிமுறைகளை முறையாகப் பின்பற்றுவதை ஊக்குவிப்பதுடன், நாட்டில் சாலைப் பாதுகாப்பை மேம்படுத்துவதுமே இதன் பிரதான நோக்கம் என வலியுறுத்தினார்.

மேலும், புதிய முறை முழுமையாக நடைமுறைப்படுத்தப்படுவதற்கு முன்னர், வாகன ஓட்டுநர்கள் அதற்குப் பழகிக்கொள்ளும் வகையில் சோதனைத் திட்டம் வடிவமைக்கப்பட்டுள்ளதாகவும் அவர் குறிப்பிட்டார்.

போக்குவரத்து விதிமீறல்களைக் குறைத்து, பொறுப்பான வாகன ஓட்டுநர் கலாசாரத்தை உருவாக்குவதற்கான நடவடிக்கைகளில் இந்தப் புதிய தவறுப் புள்ளிகள் முறை முக்கிய இடத்தைப் பெறும் என எதிர்பார்க்கப்படுகிறது.