திடீர் சொத்துக்குவிப்பு: சமூகப் பொறுப்பும் சட்டத்தின் அவசியமும்.!!!

ஒரு நாட்டின் பொருளாதார முன்னேற்றத்தை சீர்குலைப்பது போர் மட்டுமல்ல; சட்டவிரோதமாகச் சேர்க்கப்படும் கறுப்புப் பணமும் அதே அளவுக்கு ஆபத்தானது. நேர்மையாக உழைத்து வருமானம் ஈட்டும் மக்களுக்கும், சட்டத்தை மீறி செல்வம் குவிப்பவர்களுக்கும் இடையிலான இடைவெளி அதிகரிக்கும் போது, சமூகத்தின் நீதியுணர்வே கேள்விக்குறியாகிறது.

வெளிப்படையான வருமான ஆதாரங்கள் இன்றி திடீரென ஆடம்பர வாழ்க்கை வாழ்பவர்கள் மற்றும் கணிசமான சொத்துக்களைச் சேர்த்துள்ளவர்கள் குறித்து தகவல் வழங்குமாறு பொதுமக்களிடம் குற்றப் புலனாய்வுத் திணைக்களம் (CID) மற்றும் காவல்துறை விடுத்துள்ள அழைப்பு, சாதாரண அறிவிப்பு அல்ல. சட்டவிரோத சொத்துக்களுக்கு எதிராக நாடு தீவிரமாக நகர்கிறது என்பதற்கான அறிகுறியாக இதைப் பார்க்க வேண்டும்.

கடந்த சில ஆண்டுகளாக போதைப்பொருள் கடத்தல், நிதி மோசடி, ஒழுங்கமைக்கப்பட்ட குற்றச் செயல்கள் மற்றும் ஊழல் மூலம் பெருமளவு செல்வங்கள் உருவாகியுள்ளதாக பல்வேறு விசாரணைகள் சுட்டிக்காட்டுகின்றன. இவ்வாறான சட்டவிரோத வருமானங்கள் பின்னர் நிலம், வீடு, வணிக நிறுவனங்கள், ஆடம்பர வாகனங்கள் போன்ற சொத்துகளாக மாற்றப்படுவது புதிய விடயமல்ல. இதனை முறியடிக்க சட்ட அமலாக்க அமைப்புகள் உறுதியான நடவடிக்கைகளை எடுப்பது காலத்தின் கட்டாயமாகும்.

அதேவேளை, இந்த முயற்சி வெற்றியடைய வேண்டுமெனில் பொதுமக்களின் ஒத்துழைப்பு இன்றியமையாதது. தங்களது சுற்றுப்புறங்களில் சந்தேகத்திற்கிடமான சொத்துக்குவிப்பு அல்லது சட்டவிரோத நடவடிக்கைகள் குறித்து உரிய அதிகாரிகளுக்கு தகவல் வழங்குவது சமூகப் பொறுப்பாகும். குற்றங்களை மறைப்பது, குற்றவாளிகளுக்கு மறைமுக ஆதரவு வழங்குவதற்கு ஒப்பாகும்.

ஆனால், இந்த நடவடிக்கைகளில் மிகுந்த பொறுப்புணர்வும் அவசியம். தனிப்பட்ட பகை, அரசியல் பழிவாங்கல் அல்லது பொய்யான குற்றச்சாட்டுகள் விசாரணை அமைப்புகளைத் தவறாக வழிநடத்தக் கூடாது. ஒவ்வொரு தகவலும் ஆதாரங்களின் அடிப்படையில் ஆராயப்பட்டு, சட்டத்தின் நடைமுறைகளுக்கு இணங்க மட்டுமே நடவடிக்கை எடுக்கப்பட வேண்டும்.

சட்டத்தின் ஆட்சி என்பது குற்றவாளிகளைத் தண்டிப்பதற்காக மட்டுமல்ல; நிரபராதிகளைப் பாதுகாப்பதற்கும் ஆகும். எனவே, விசாரணைகளில் வெளிப்படைத்தன்மை, தொழில்முறை அணுகுமுறை மற்றும் நீதிநெறி கட்டாயமாகப் பேணப்பட வேண்டும்.

நேர்மையான உழைப்பின் மூலம் செல்வம் சேர்ப்பவர்களை ஊக்குவிப்பதும், சட்டவிரோத வழிகளில் செல்வம் குவிப்பவர்களைத் தடுக்கவும் அரசு சம அளவில் உறுதியாக இருக்க வேண்டும். இல்லையெனில், சட்டத்தை மதிக்கும் மக்களின் நம்பிக்கை சிதையும்; குறுக்கு வழியில் செல்வந்தராகும் கலாசாரம் வேரூன்றும் அபாயம் உருவாகும்.

சட்டவிரோத சொத்துக்களுக்கு எதிரான போராட்டம் தொடர்ச்சியானதாக இருக்க வேண்டும். அது சில நாட்கள் நடைபெறும் நடவடிக்கையாக அல்லாமல், நிரந்தர தேசியக் கொள்கையாக அமைய வேண்டும். சட்டம் அனைவருக்கும் சமம் என்ற நம்பிக்கையை நடைமுறையில் நிரூபிக்கும்போதுதான் மக்கள் நீதித்துறையின் மீதும் அரசின் மீதும் நம்பிக்கையுடன் இருப்பார்கள்.

ஒரு நாட்டின் உண்மையான செல்வம் அதன் இயற்கை வளங்களில் அல்ல; அதன் சட்ட ஒழுங்கிலும், நீதியிலும், நேர்மையிலும் உள்ளது. அந்த அடித்தளத்தைப் பாதுகாப்பது அரசின் பொறுப்பு மட்டுமல்ல; ஒவ்வொரு குடிமகனின் கடமையும் ஆகும். சட்டவிரோத செல்வத்துக்கு எதிராக விழிப்புணர்வுடன் நிற்கும் சமூகமே பாதுகாப்பான, நீதிமிக்க மற்றும் வளமான எதிர்காலத்தை உருவாக்கும்.

✍ எம்.ரி.எம் —