லண்டன் நோக்கிப் புறப்பட்ட ஸ்ரீலங்கன் விமானத்துடன் பறவை மோதல்: கட்டுநாயக்க விமான நிலையத்தில் அவசரத் தரையிறக்கம்.!!!
கட்டுநாயக்க பண்டாரநாயக்க சர்வதேச விமான நிலையத்திலிருந்து இன்று (28) பிற்பகல் இங்கிலாந்தின் லண்டன் நோக்கிப் புறப்பட்ட ஸ்ரீலங்கன் விமான சேவைக்குச் சொந்தமான UL-503 என்ற Airbus A330 ரக விமானம், பறவை மோதியதைத் தொடர்ந்து மீண்டும் கட்டுநாயக்க விமான நிலையத்தில் பாதுகாப்பாகத் தரையிறக்கப்பட்டுள்ளது.
குறித்த விமானம் இன்று பிற்பகல் 12.55 மணியளவில் லண்டன் நோக்கிப் புறப்பட்டதாக ஸ்ரீலங்கன் விமான சேவையின் நிறுவனத் தொடர்பாடல் பிரிவின் பேச்சாளர் ஒருவர் தெரிவித்துள்ளார்.
விமானத்தில் 269 பயணிகளும் 15 பணியாளர்களும் இருந்துள்ளனர். விமானம் புறப்பட்ட சிறிது நேரத்திலேயே பறவை மோதியதைத் தொடர்ந்து, விமானி நிலைமையைக் கட்டுப்பாட்டுக்குள் கொண்டு வந்து விமானத்தை மீண்டும் கட்டுநாயக்க விமான நிலையத்தில் பாதுகாப்பாகத் தரையிறக்கியுள்ளார்.
இதனையடுத்து, விமானத்திலிருந்த பயணிகள் அனைவரும் பாதுகாப்பாக வெளியேற்றப்பட்டுள்ளனர். அவர்களுக்குத் தேவையான உபசரிப்புகளை வழங்கவும் ஸ்ரீலங்கன் விமான சேவை நடவடிக்கை எடுத்துள்ளது.
மேலும், பாதிக்கப்பட்ட பயணிகளை மாற்று விமானம் மூலம் இங்கிலாந்தின் ஹீத்ரோ விமான நிலையத்திற்கு அனுப்பி வைப்பதற்கான ஏற்பாடுகளும் மேற்கொள்ளப்பட்டுள்ளன.
பறவை மோதலுக்கு உள்ளான விமானம் தற்போது பழுதுபார்க்கும் பணிகளுக்காக அனுப்பப்பட்டுள்ளதாக ஸ்ரீலங்கன் விமான சேவை நிறுவனம் தெரிவித்துள்ளது.
