சிறப்பு படகுகள் படைப்பிரிவுப் பயிற்சியை வெற்றிகரமாக முடித்த: கடற்படை வீரர்களுக்கு பதக்கங்கள் அணிவிப்பு.!!!
-கற்பிட்டி எம். எச். எம். சியாஜ்-
இலங்கை கடற்படையின் சிறப்பு படகுகள் படைப்பிரிவின் 32வது ஆட்சேர்ப்பு பயிற்சியை வெற்றிகரமாக நிறைவு செய்த 24 மாலுமிகளுக்கு பதக்கங்கள் அணிவிப்பு நிகழ்வு திருகோணமலை கடற்படைத் தளத்தில் வெள்ளிக்கிழமை (10) நடைபெற்றது.
சிறப்பு படகுகள் படைப்பிரிவு கட்டளை அதிகாரி கமாண்டர் லக்மால் வீரக்கொடியின் அழைப்பின் பேரில் நடைபெற்ற இந்நிகழ்வுக்கு கடற்படைத் தளபதி வைஸ் அட்மிரல் கான்சன பானகொட தலைமை தாங்கினார்.
இந்நிகழ்வில், பயிற்சியை வெற்றிகரமாக முடித்த மாலுமிகளுக்கு படைப்பிரிவின் சின்னங்கள் அணிவிக்கப்பட்டதுடன், பல்வேறு பிரிவுகளில் சிறப்பான திறமைகளை வெளிப்படுத்திய வீரர்களுக்கு வெற்றிக்கிண்ணங்களும் வழங்கப்பட்டன.
அதிகபட்ச புள்ளிகளைப் பெற்ற பயிற்சி வீரருக்கு கமாண்டர் எஸ்.என்.கே. சில்வா நினைவுக் கிண்ணமும், சிறந்த தடகள வீரருக்கு கே.ஜி. சாந்த நினைவுக் கோப்பையும், சிறந்த பயிற்சியாளருக்கான லெப்டினன்ட் கமாண்டர் எஸ்.டபிள்யூ. கால்லகே நினைவுக் கோப்பையும் வழங்கப்பட்டன. மேலும், சிறந்த துப்பாக்கிச் சுடும் வீரர், சிறந்த உடல் தகுதி வீரர் மற்றும் சிறந்த நீச்சல் வீரர் ஆகியோருக்கும் தனித்தனி விருதுகள் வழங்கப்பட்டன.
நிகழ்வில் உரையாற்றிய கடற்படைத் தளபதி, புதிய வீரர்களின் தைரியம், ஒழுக்கம் மற்றும் அர்ப்பணிப்பு கடற்படையின் பலத்தை மேலும் உயர்த்தும் என தெரிவித்தார். பயிற்றுனர்களின் பங்களிப்பை பாராட்டிய அவர், பெற்றோர்களின் தியாகத்துக்கும் நன்றியைத் தெரிவித்தார்.
மேலும், சிறப்பு படகுகள் படைப்பிரிவின் வீரர்கள் வான், கடல் மற்றும் நிலம் ஆகிய மூன்று தளங்களிலும் தங்களது திறன்களை வெளிப்படுத்தும் செயல்விளக்கத்தையும் நிகழ்த்தினர். இதில் மறைவிலிருந்து சுடுதல், போர் மூழ்காளர்கள், VBSS குழுக்கள், கடற்படை நாய்ப் படைப்பிரிவு, தற்காப்புக் கலைக் குழுக்கள் மற்றும் வான்குடை வீரர்கள் உள்ளிட்டோர் பங்கேற்றனர்.
இந்நிகழ்வில் கடற்படையின் பிரதித் தளபதி, கிழக்கு கடற்படைக் கட்டளையகத் தளபதி, மூத்த அதிகாரிகள், முப்படைகளின் அதிகாரிகள், விருந்தினர்கள் மற்றும் பயிற்சியை நிறைவு செய்த வீரர்களின் பெற்றோர் உள்ளிட்டோர் கலந்து கொண்டனர்.
