கொழும்பு கோட்டை ரயில் நிலையம் புதுப்பித்தல் பணிகள் இன்று தொடக்கம்.!!!
கொழும்பு கோட்டை ரயில் நிலையத்தின் பயணிகள் வசதிகளை மேம்படுத்தும் பணிகள் இன்று (09) அதிகாரப்பூர்வமாக தொடங்கியுள்ளன. இலங்கை பிரதமர் மாண்புமிகு டாக்டர் ஹரினி அமரசூரிய தலைமையில் இந்த நிகழ்வு இடம்பெற்றது.
இத்திட்டம் போக்குவரத்து, நெடுஞ்சாலை மற்றும் நகர அபிவிருத்தி அமைச்சின் திட்டமிடலின் கீழும், இலங்கை ரயில்வே திணைக்களத்தின் சேவைத் திட்டத்தின் மூலமும் செயல்படுத்தப்படுகிறது. தொல்லியல் திணைக்களத்தின் அனுமதிக்கப்பட்ட நுட்பங்களின்படி இப்பணிகள் மேற்கொள்ளப்படுகின்றன.
இத்திட்டத்தின் கீழ் பயணிகளுக்கு பல்வேறு சேவைகளை வழங்கும் புதிய மூன்று மாடி கட்டிடம் ஒன்று கட்டப்படவுள்ளது. இதில் கூடும் இடம், லவுஞ்ச், உணவு அரங்குகள், சுகாதார வசதிகள், தகவல் மையம், மருந்தகம், அஞ்சல் சேவை மையம் உள்ளிட்டவை அமையும்.
நிலையத்திற்குள் உள்ள பழைய இரும்பு ஏர் பிரிட்ஜ் அமைப்பு மின்னணு லிஃப்ட்கள் மற்றும் தானியங்கி அமைப்புகளுடன் மேம்படுத்தப்படும். பயணிகள் அனைத்து இரயில் பிளாட்பாரங்களுக்கும் எளிதில் செல்லும் வகையில் ஏர் பிரிட்ஜ் கட்டப்படும்.
இதன் ஒரு முனை கம்பனி வீதி மற்றும் டி.ஆர். விஜேவர்தன வீதியுடனும், மறுமுனை மரதான மற்றும் பாஸ்டியன் வீதியுடனும் இணைக்கப்படும்.
மேலும், பயணிகளுக்கு டிஜிட்டல் தொழில்நுட்பத்துடன் கூடிய இ-கேட் வசதியும் வழங்கப்படும். பொது போக்குவரத்து வளாகமும் அமைக்கப்படும்.
இதில் முச்சக்கர வாகனங்கள், வாடகை வாகனங்கள் மற்றும் தனியார் வாகனங்களை பாதுகாப்பாக நிறுத்தும் வசதிகள் இருக்கும்.
இத்திட்டம் 15 மாதங்களுக்குள் நிறைவடையும் என எதிர்பார்க்கப்படுகிறது.
மொத்த செலவு 2,162 மில்லியன் ரூபாய் ஆகும். இதில் ஆசிய அபிவிருத்தி வங்கியிடமிருந்து 1,500 மில்லியன் ரூபாய் கடனாகவும், மீதமுள்ள 662 மில்லியன் ரூபாய் இலங்கை அரச நிதியாகவும் பயன்படுத்தப்படும்.
