தனிநபருக்காகச் சட்டத்தை மாற்ற முடியாது: அரசாங்கம் திட்டவட்டம் – அமைச்சர் நளிந்த ஜயதிஸ்ஸ.!!!
எந்தவொரு தனிநபருக்கும் சாதகமாகச் சட்டத்தை வளைத்தோ அல்லது திருத்தியோ செயற்பட அரசாங்கம் தயாரில்லை என அமைச்சரவைப் பேச்சாளரும் அமைச்சருமான நளிந்த ஜயதிஸ்ஸ தெரிவித்துள்ளார்.
சிறையில் உள்ள கலகொடஅத்தே ஞானசார தேரரை விடுதலை செய்யக் கோரி பௌத்த பிக்குகள் முன்னெடுத்து வரும் போராட்டங்கள் தொடர்பில் எழுப்பப்பட்ட கேள்விகளுக்குப் பதிலளிக்கும்போதே அவர் இதனைத் தெரிவித்துள்ளார்.
அதிகாரத்தில் இருப்பவர், அரசியல் செல்வாக்கு கொண்டவர் அல்லது சமூகத்தில் உயர்ந்த அந்தஸ்தில் இருப்பவர் என்ற வேறுபாடின்றி, சட்டம் அனைவருக்கும் சமமாக அமுல்படுத்தப்பட வேண்டும் என்பதில் அரசாங்கம் உறுதியாக இருப்பதாக அவர் குறிப்பிட்டுள்ளார்.
முந்தைய அரசாங்கங்களின் ஆட்சிக் காலங்களில், சாதாரண மக்களுக்கும் அரசியல் அதிகாரம் அல்லது செல்வாக்கு கொண்டவர்களுக்கும் இடையில் சட்டம் அமுல்படுத்தப்பட்ட விதத்தில் வேறுபாடுகள் காணப்பட்டதாகப் பொதுமக்கள் கருதியதே, ஜனாதிபதி அநுர குமார திஸாநாயக்கவின் தேர்தல் வெற்றிக்கும் அரசாங்கம் நாடாளுமன்றத்தில் மூன்றில் இரண்டு பெரும்பான்மையைப் பெற்றமைக்கும் முக்கிய காரணங்களில் ஒன்றாகும் என அமைச்சர் தெரிவித்துள்ளார்.
இத்தகைய நடைமுறைகளுக்கு முற்றுப்புள்ளி வைத்து, ஒருவரின் பதவி, அதிகாரம் அல்லது சமூக அந்தஸ்தைப் பொருட்படுத்தாமல் சட்டத்தைச் சமமாக அமுல்படுத்துவதாக அரசாங்கம் உறுதியளித்திருந்தது என்றும் அவர் கூறியுள்ளார்.
இந்த எதிர்பார்ப்பு அரசாங்கத்துக்கு வாக்களித்தவர்களிடம் மட்டுமல்லாமல், வாக்களிக்காதவர்களிடமும் காணப்படுவதாக அவர் சுட்டிக்காட்டியுள்ளார்.
முந்தைய நல்லாட்சி அரசாங்கத்தின் காலத்தில் வழங்கப்பட்ட ஜனாதிபதி மன்னிப்பைப் போன்று ஞானசார தேரருக்கும் விடுதலை வழங்கப்பட வேண்டும் என்ற கோரிக்கை தொடர்பில் கருத்துத் தெரிவித்த அமைச்சர், தேரருக்கு நீதிமன்றத்தினால் தண்டனை விதிக்கப்பட்டுள்ளதாகக் குறிப்பிட்டுள்ளார்.
நீதிமன்றத் தீர்ப்புகளுக்கு எதிராக மேல்முறையீடு செய்வதற்கு ஒவ்வொருவருக்கும் உரிமை உள்ளதாகவும், இந்த விவகாரத்தில் தொடர்புடைய சட்ட நடவடிக்கைகள் ஏற்கெனவே நிறைவடைந்துள்ளதாகவும் அவர் தெரிவித்துள்ளார்.
நீதிமன்ற உத்தரவுகளை நடைமுறைப்படுத்துவதே அரசாங்கத்தின் பொறுப்பு எனத் தெரிவித்த அவர், ஒருவரின் அடையாளம் அல்லது சமூக அந்தஸ்தைக் கருத்தில் கொண்டு விதிவிலக்குகளை வழங்க முடியாது என்றும் வலியுறுத்தியுள்ளார்.
தொடரும் பிக்குகளின் போராட்டம்
கலகொடஅத்தே ஞானசார தேரரை விடுதலை செய்யக் கோரி, “சங்கையைக் காப்போம் – நீதிக்கான நடைபேரணி” என்ற தொனிப்பொருளில் கடந்த ஒக்டோபர் 10ஆம் திகதி கண்டி ஸ்ரீ தலதா மாளிகைக்கு அருகிலிருந்து பௌத்த பிக்குகள் நடைபேரணியை ஆரம்பித்தனர்.
ஒக்டோபர் 15ஆம் திகதி கொழும்பிலுள்ள ஜனாதிபதி செயலகத்தை வந்தடைந்த அவர்கள், அரசாங்கத்திடமிருந்து உறுதியான பதில் கிடைக்க வேண்டும் எனக் கோரி அங்கு இரவு முழுவதும் தங்கியிருந்து போராட்டத்தில் ஈடுபட்டனர்.
எனினும், குறித்த பகுதியில் போராட்டம் நடத்துவதைத் தடைசெய்யும் நீதிமன்ற உத்தரவைத் தொடர்ந்து, தற்காலிக கூடாரங்களை அகற்றிய பிக்குகள் நேற்று (16) புத்தசாசன அமைச்சுக்குச் சென்றனர்.
அங்கு பேச்சுவார்த்தை நடத்துவதற்கு அமைச்சு வாய்ப்பளித்ததையடுத்து, போராட்டத்தில் ஈடுபட்ட பிக்குகள் சார்பில் நான்கு பிரதிநிதிகள் கலந்துகொண்டனர்.
எனினும், ஞானசார தேரர் விடுதலை செய்யப்படும் வரை கொழும்பு விஹாரமஹாதேவி பூங்காவில் தங்கியிருந்து போராட்டத்தைத் தொடரப்போவதாகப் பேச்சுவார்த்தையில் பங்கேற்ற மகா சங்கத்தினர் தெரிவித்துள்ளனர்.
