நானுஓயாவில் 100 அடி பள்ளத்தில் கவிழ்ந்த லொறி: மயிரிழையில் உயிர் தப்பிய மூவர்.!!!
நுவரெலியா – ஹட்டன் – நானுஓயா சுற்றுவட்ட வீதியின் கிரிமெட்டிய பகுதியில், சுமார் 100 அடி பள்ளத்தில் லொறியொன்று கவிழ்ந்து விபத்துக்குள்ளாகியுள்ளது.
இன்று (04) முற்பகல் சுமார் 10 மணியளவில் இடம்பெற்ற இவ்விபத்தில், லொறியில் பயணித்த மூவரும் அதிர்ஷ்டவசமாக உயிர் தப்பியுள்ளனர்.
கதிர்காமத்திலிருந்து தலவாக்கலை நோக்கித் தீபாவளிப் பண்டிகைக்கான விற்பனைப் பொருட்களான ஆடைகளை ஏற்றிக்கொண்டு பயணித்த லொறியே இவ்வாறு விபத்துக்குள்ளாகியுள்ளது.
பயணித்துக்கொண்டிருந்த லொறி திடீரென வீதியை விட்டு விலகி பள்ளத்தை நோக்கிச் சென்றபோது, அதிலிருந்த மூவரும் உடனடியாக வெளியே குதித்ததால் உயிர் தப்பியுள்ளனர். இதனையடுத்து, லொறி சுமார் 100 அடி பள்ளத்தில் கவிழ்ந்து பலத்த சேதமடைந்துள்ளது.
இவ்விபத்து தொடர்பில் நானுஓயா பொலிஸார் மேலதிக விசாரணைகளை முன்னெடுத்து வருகின்றனர்.
