இலங்கை கடற்பரப்பில் அவசர உதவி கோரிய 40 ஈரானிய மாலுமிகள்: காலி துறைமுகம் ஊடாக மீட்பு.!!!
இலங்கையின் கடற்கரையிலிருந்து சுமார் 24 கடல் மைல் தொலைவில் வணிகக் கப்பல்களில் இருந்த சுமார் 40 ஈரானிய மாலுமிகள், அவசர மருத்துவ உதவி கோரியதைத் தொடர்ந்து மனிதாபிமான நடவடிக்கையின் கீழ் காலி துறைமுகம் ஊடாக இலங்கைக்குக் கொண்டுவரப்பட்டுள்ளனர்.
இது தொடர்பில் தெரிவித்துள்ள இலங்கை வெளிநாட்டு அலுவல்கள் அமைச்சு, மாலுமிகளின் உடல்நிலை தொடர்பாகக் கிடைத்த அவசர மருத்துவ உதவிக் கோரிக்கைகளுக்குப் பதிலளிக்கும் வகையில் இந்த நடவடிக்கை முன்னெடுக்கப்பட்டதாகக் குறிப்பிட்டுள்ளது.
கடலில் இருந்த மாலுமிகளுக்கு மருத்துவ உதவி தேவைப்பட்டதைத் தொடர்ந்து, அவர்களைப் பாதுகாப்பாகக் கரைக்குக் கொண்டுவருவதற்கான ஏற்பாடுகள் மேற்கொள்ளப்பட்டுள்ளன.
குறித்த மீட்பு நடவடிக்கை கொழும்பிலுள்ள ஈரான் தூதரகத்தின் ஒருங்கிணைப்பில் முன்னெடுக்கப்பட்டதுடன், அதற்குத் தேவையான வசதிகளும் தூதரகத்தின் ஊடாக ஏற்பாடு செய்யப்பட்டதாகத் தெரிவிக்கப்பட்டுள்ளது.
இதனடிப்படையில், சுமார் 40 ஈரானிய மாலுமிகள் காலி துறைமுகம் ஊடாக இலங்கைக்குக் கொண்டுவரப்பட்டு, அவர்களுக்குத் தேவையான மருத்துவ சிகிச்சைகள் வழங்கப்பட்டுள்ளன.
மருத்துவ உதவிகளைப் பெற்றுக்கொண்ட மாலுமிகள் பின்னர் இலங்கையிலிருந்து புறப்பட்டுத் தமது தாய்நாடான ஈரானுக்குத் திரும்பியுள்ளதாகவும் வெளிநாட்டு அலுவல்கள் அமைச்சு உறுதிப்படுத்தியுள்ளது.
இந்த நடவடிக்கை முழுமையாக மனிதாபிமான அடிப்படையில் மேற்கொள்ளப்பட்டதாக அமைச்சின் தகவல்கள் தெரிவிக்கின்றன.
எனினும், மாலுமிகளுக்கு ஏற்பட்ட உடல்நலப் பிரச்சினைகள் மற்றும் அவர்கள் பயணித்த வணிகக் கப்பல்கள் தொடர்பான மேலதிக விபரங்கள் இதுவரை வெளியிடப்படவில்லை.
