‘லைஃப் சிட்டீஸ்’ திட்டத்தில் மட்டக்களப்பு; நகரின் எழுச்சிக்கு புதிய பாதை.!!!

நாட்டின் நகரமைப்புத் துறையில் இதுவரை நிலவிய முறையற்ற திட்டமிடல் மற்றும் நிறுவனங்களுக்கு இடையேயான ஒருங்கிணைப்பின்மைக்கு தீர்வு காணும் வகையில், அரசாங்கத்தின் 2026ஆம் ஆண்டுக்கான வரவு-செலவுத் திட்டத்தின் கீழ் ‘லைஃப் சிட்டீஸ்’ (Life Cities) எனும் புதிய நகர மேம்பாட்டுத் திட்டம் அறிமுகப்படுத்தப்பட்டுள்ளது.

தரவு அடிப்படையிலான முறையான அணுகுமுறையுடன், நகரங்களின் பல்வேறு துறைகளையும் ஒருங்கிணைத்து மேம்படுத்துவதே இத்திட்டத்தின் பிரதான நோக்கமாகும்.

மட்டக்களப்புக்கு சிறப்பு முன்னுரிமை

இத்திட்டத்தின் கீழ் தெரிவுசெய்யப்பட்ட பிரதான நகரங்களில் மட்டக்களப்பு நகரம் சிறப்பு முன்னுரிமையுடன் அபிவிருத்தி செய்யப்படவுள்ளது.

கிழக்கின் முத்தமிழ்ச் சீமை என அழைக்கப்படும் மட்டக்களப்பின் தனித்துவமான கலாச்சாரம், இயற்கை அழகு, வரலாற்றுச் சின்னங்கள் மற்றும் புவியியல் சிறப்பம்சங்களை அடிப்படையாகக் கொண்டு நகர மேம்பாட்டுப் பணிகள் முன்னெடுக்கப்படவுள்ளன.

மட்டக்களப்பு மக்களின் பொருளாதாரத்தை மேம்படுத்துவதுடன், உள்நாட்டு மற்றும் வெளிநாட்டு சுற்றுலாப் பயணிகளை ஈர்க்கும் வகையில் உலகத்தரம் வாய்ந்த நவீன வசதிகளைக் கொண்ட வர்த்தக மற்றும் சுற்றுலா மையமாக நகரை மேம்படுத்துவதும் இதன் முக்கிய இலக்காகும்.

இதன் கீழ் மட்டக்களப்பு வாவியின் அழகை மேம்படுத்துதல், உட்கட்டமைப்பு வசதிகளை விரிவுபடுத்துதல், முதலீட்டாளர்களுக்கு உகந்த சூழலை உருவாக்குதல் உள்ளிட்ட பல்வேறு அபிவிருத்திப் பணிகள் துரிதப்படுத்தப்படவுள்ளன.

ரூ.65 பில்லியன் நிதி ஒதுக்கீடு

நாடளாவிய ரீதியில் நகரங்களின் தனித்துவமான சிறப்பம்சங்களை கருத்திற்கொண்டு திட்டமிடப்பட்டுள்ள ‘லைஃப் சிட்டீஸ்’ திட்டத்திற்காக மொத்தமாக ரூ.65 பில்லியன் நிதி ஒதுக்கீடு செய்யப்பட்டுள்ளதாக தெரிவிக்கப்பட்டுள்ளது.

2026ஆம் ஆண்டின் முதலாம் கட்டத்தில் மட்டக்களப்பு, யாழ்ப்பாணம், மாத்தறை, பதுளை, மாத்தளை, தம்புத்தேகம, வவுனியா, ஹட்டன், சலாவத்தை மற்றும் எஹலியகொட ஆகிய நகரங்கள் அபிவிருத்தி செய்யப்படவுள்ளன.

2027ஆம் ஆண்டின் இரண்டாம் கட்டத்தில் களுத்துறை, காலி, குருநாகல், திருகோணமலை, இரத்தினபுரி, தெஹிவளை, பாணந்துறை, மத்துகமை, கேகாலை, பண்டாரவளை, கல்முனை, அக்குரெச்சை, புத்தளம், நாத்தாண்டி, கந்தளாய் மற்றும் எல்ல ஆகிய நகரங்கள் தெரிவுசெய்யப்பட்டுள்ளன.

பொருளாதார வளர்ச்சியை நோக்கிய நகர மேம்பாடு

தேசிய கொள்கைகளுடன் நகர அபிவிருத்திச் செயல்முறைகளை இணைத்தல், பொதுமக்களுக்கான வசதிகள் மற்றும் சேவைகளின் விநியோகத்தை மேம்படுத்தல், முதலீடுகளுக்கு ஏற்ற திறமையான மற்றும் நிலையான நகர மையங்களை உருவாக்குதல் ஆகியவை இத்திட்டத்தின் பிரதான நோக்கங்களாகும்.

குறிப்பாக மட்டக்களப்பு போன்ற முக்கிய நகரங்களின் பொருளாதார வாய்ப்புகளை பன்மடங்கு அதிகரித்து, உள்நாட்டு மற்றும் வெளிநாட்டு சுற்றுலாப் பயணிகளின் விருப்பமான இடமாக மாற்றுவதற்கு இத்திட்டம் வழிவகுக்கும் என எதிர்பார்க்கப்படுகிறது.

இதன் மூலம் மட்டக்களப்பு நகரம் எதிர்காலத்தில் நாட்டின் முன்னணி பொருளாதார மற்றும் சுற்றுலா மையங்களில் ஒன்றாக உருவெடுக்கும் வாய்ப்பு அதிகரித்துள்ளது.