7.8 மில்லியன் ரூபாய் நிதி விவகாரம்: பசில் ராஜபக்ஷவைக் கைது செய்ய குற்றப் புலனாய்வுத் திணைக்களத்திற்கு நீதிமன்றம் உத்தரவு.!!!
• சர்வதேச பொலிஸார் ஊடாக சிவப்பு அறிவித்தலைப் பெறவும் நடவடிக்கை எடுக்குமாறு உத்தரவு.
சுற்றுலா மேம்பாட்டுப் பணியகத்தின் நிதியைத் தவறாகப் பயன்படுத்தியதாகக் கூறப்படும் சம்பவம் தொடர்பில், முன்னாள் பொருளாதார அபிவிருத்தி அமைச்சர் பசில் ராஜபக்ஷவைக் கைது செய்து நீதிமன்றத்தில் ஆஜர்படுத்துமாறு கோட்டை நீதவான் பசன் அமரசேன இன்று (14) குற்றப் புலனாய்வுத் திணைக்களத்தின் (CID) சட்டவிரோத சொத்துக்கள் விசாரணைப் பிரிவுக்கு உத்தரவிட்டுள்ளார்.
அத்துடன், பசில் ராஜபக்ஷவுக்கு எதிராக சர்வதேச பொலிஸார் (INTERPOL) ஊடாக சிவப்பு அறிவித்தலைப் பெறுவதற்குத் தேவையான நடவடிக்கைகளை மேற்கொள்ளுமாறும் நீதவான் உத்தரவிட்டுள்ளார்.
இது தொடர்பாக குற்றப் புலனாய்வுத் திணைக்களத்தின் சட்டவிரோத சொத்துக்கள் விசாரணைப் பிரிவு நீதிமன்றத்தில் சமர்ப்பித்த அறிக்கை மற்றும் முன்வைத்த கருத்துக்களைப் பரிசீலித்த பின்னரே இந்த உத்தரவு பிறப்பிக்கப்பட்டுள்ளது.
7.8 மில்லியன் ரூபாய் நிதி தொடர்பில் விசாரணை
2014ஆம் ஆண்டு சுற்றுலா மேம்பாட்டுப் பணியகத்துக்கு ஒதுக்கப்பட்ட 7.8 மில்லியன் ரூபாய் நிதியை, அந்தப் பணியகத்தின் மேம்பாட்டுச் செயற்பாடுகளுக்குப் பயன்படுத்தாமல், ஊவா மாகாண சபைத் தேர்தலை முன்னிட்டு 12,000 டி-ஷர்ட்டுகளைப் பெற்றுக்கொள்வதற்குப் பயன்படுத்தியதாகக் குற்றச்சாட்டு முன்வைக்கப்பட்டுள்ளது.
இதன் மூலம் அரசாங்கத்துக்கு நிதி இழப்பு ஏற்படுத்தப்பட்டதாகக் கூறப்படும் இந்தச் சம்பவம் தொடர்பிலேயே குற்றப் புலனாய்வுத் திணைக்களத்தின் சட்டவிரோத சொத்துக்கள் விசாரணைப் பிரிவு நீதிமன்றத்தில் அறிக்கை சமர்ப்பித்திருந்தது.
இந்த வழக்கில் நீதிமன்றம் பிறப்பித்துள்ள உத்தரவுகளுக்கு அமைய, அடுத்தகட்ட சட்ட நடவடிக்கைகள் முன்னெடுக்கப்படவுள்ளன.
