இறக்குமதி வாகனங்களுக்கு 50% கூடுதல் வரி – அரசாங்கம் அறிவிப்பு.!!!
இலங்கைக்கு இறக்குமதி செய்யப்படும் மோட்டார் வாகனங்களுக்கு பொருந்தும் சுங்க இறக்குமதி வரிகளுக்கு மேலாக தற்காலிகமாக 50 சதவீத கூடுதல் வரி அறிமுகப்படுத்தப்பட்டுள்ளதாக அரசாங்கம் அறிவித்துள்ளது.
இன்று (16) முதல் அமுலுக்கு வரும் இந்த புதிய கூடுதல் வரி மூன்று மாத காலத்திற்கு நடைமுறையில் இருக்கும் என தெரிவிக்கப்பட்டுள்ளது.
திருத்தப்பட்ட சுங்க கட்டளைச் சட்டத்தின் 10A பிரிவின் கீழ், நிதி, திட்டமிடல் மற்றும் பொருளாதார அபிவிருத்தி அமைச்சகத்தால் வெளியிடப்பட்ட விசேஷ வர்த்தமானி அறிவிப்பின் மூலம் இந்த தீர்மானம் வெளியிடப்பட்டுள்ளது.
இந்த கூடுதல் வரி பொது இறக்குமதி வரி அடிப்படைக்கும், சலுகை இறக்குமதி வரி அடிப்படைக்கும் பொருந்தும் என குறிப்பிடப்பட்டுள்ளது.
இதன்படி பயணிகள் போக்குவரத்து வாகனங்கள், மோட்டார் கார்கள், ஸ்டேஷன் வேகன்கள், பந்தயக் கார்கள், ஆம்புலன்ஸ்கள், சிறைச்சாலை வாகனங்கள், சவ ஊர்திகள், மோட்டார் இல்லங்கள் மற்றும் கோல்ஃப் கார்கள் உள்ளிட்ட பல்வேறு வகையான வாகனங்களுக்கு இந்த கூடுதல் வரி விதிக்கப்படவுள்ளது.
அதேவேளை, 2026 மே 15 ஆம் திகதி அல்லது அதற்கு முன்னர் தொடங்கப்பட்ட கடன் கடிதங்கள் (L/C) மூலம் ஆதரிக்கப்படும் வாகன இறக்குமதிகளுக்கு இந்த புதிய கூடுதல் வரியிலிருந்து விலக்கு வழங்கப்பட்டுள்ளதாகவும் தெரிவிக்கப்பட்டுள்ளது.
இந்த விசேஷ வர்த்தமானி ஆணை நிதி அமைச்சராக உள்ள அனுர குமார திசாநாயக்க அவர்களின் அதிகாரத்தின் கீழ் இன்று வெளியிடப்பட்டுள்ளதாக அரசாங்கம் தெரிவித்துள்ளது.
