மழையுடனான வானிலை: அவசர உதவிக்காக 117 என்ற எண்ணை தொடர்புகொள்ளலாம் – அனர்த்த முகாமைத்துவ மையம் அறிவிப்பு.!!!
நாட்டில் தற்போது நிலவி வரும் கடும் மழையுடனான வானிலை காரணமாக மக்கள் 24 மணி நேரமும் பேரிடர் தொடர்பான அவசர உதவிகளை பெற 117 என்ற தொலைபேசி எண்ணை தொடர்புகொள்ளலாம் என இலங்கையின் அனர்த்த முகாமைத்துவ மத்திய நிலையத்தின் பிரதிப்பணிப்பாளர் பிரதீப் கொடிப்பிலி தெரிவித்துள்ளார்.
பருவமழை காலத்துக்கு முன்னெச்சரிக்கையாக தயாராகுமாறு பிரதமர் சமீபத்தில் பேரிடர் மேலாண்மை மையத்திற்கு வழங்கிய அறிவுறுத்தல்களின் அடிப்படையில் பல முக்கிய நடவடிக்கைகள் மேற்கொள்ளப்பட்டுள்ளதாகவும் அவர் குறிப்பிட்டுள்ளார்.
இலங்கையில் தற்போது 32 மில்லியனுக்கும் அதிகமான சிம் கார்டுகள் பயன்பாட்டில் உள்ளன. இதனை கருத்தில் கொண்டு தொலைத்தொடர்பு ஆணைக்குழுவின் ஒப்புதலுடன், நாட்டிலுள்ள அனைத்து கைபேசி பயனாளர்களுக்கும் முன் எச்சரிக்கை தகவல்களை அனுப்புவதற்காக சம்பந்தப்பட்ட தொலைபேசி நிறுவனங்களுடன் ஒப்பந்தம் கையெழுத்திடப்பட்டுள்ளதாகவும் தெரிவிக்கப்பட்டுள்ளது.
மேலும், அனைத்து ஊடகங்களின் குறுஞ்செய்தி (SMS) சேவைகளும் அவசர எச்சரிக்கை அமைப்புடன் இணைக்கப்பட்டுள்ளதால், குறுஞ்செய்தி முறையின் மூலம் 20 இலட்சத்திற்கும் அதிகமான மக்களுக்கு ஒரே நேரத்தில் தகவல்களை வழங்க முடியும் என கூறப்பட்டுள்ளது.
அதேநேரத்தில், மக்களுக்கு முன்கூட்டியே அவசர எச்சரிக்கைகளை வழங்க 15-க்கும் மேற்பட்ட எச்சரிக்கை முறைகள் தற்போது செயல்பாட்டில் உள்ளதாக அனர்த்த முகாமைத்துவ மையம் மேலும் தெரிவித்துள்ளது.
