சர்வதேச சந்தையில் எரிபொருள் விலை உயர்வு; ரூ.41 பில்லியன் மானியம் வழங்க அரசாங்கம் தீர்மானம்.!!!

இலங்கையில் தற்போது நடைமுறையில் உள்ள பெட்ரோல் மற்றும் டீசல் சில்லறை விலைகள், சர்வதேச சந்தையின் குறைந்தபட்ச விலையையும் விடக் குறைவாக இருப்பதாக லங்கா ஐஓசி (LIOC) நிறுவனத்தின் முகாமைத்துவப் பணிப்பாளர் கே. ரகு தெரிவித்துள்ளார்.

சிங்கப்பூர் மற்றும் இந்தியாவிலிருந்து போட்டித்தன்மையான விலையில் எரிபொருளை கொள்வனவு செய்துவரும் போதிலும், தற்போதைய சில்லறை விலை கொள்வனவுச் செலவை ஈடுசெய்ய போதுமானதாக இல்லை என அவர் சுட்டிக்காட்டியுள்ளார்.

செப்டம்பர் 26ஆம் திகதி நிலவரப்படி, தற்போதைய விலையில் ஒரு லீற்றர் டீசல் விற்பனை செய்வதால் சுமார் 140 ரூபாய் நஷ்டம் ஏற்படுவதாக LIOC தெரிவித்துள்ளது. நிறுவனத்தின் டீசல் கொள்வனவுச் செலவு லீற்றருக்கு சுமார் 136 ரூபாயாக உள்ளதாகவும், RM Parks மற்றும் Sinopec உள்ளிட்ட வெளிநாட்டு நிறுவனங்களுடன் ஒப்பிடுகையில் இது குறைந்த கொள்வனவுச் செலவாக இருப்பதாகவும் தெரிவிக்கப்பட்டுள்ளது.

பிராந்திய எரிபொருள் விலைகளுக்கான முக்கிய அளவுகோலாகப் பயன்படுத்தப்படும் MOPS விலையுடன் ஒப்பிடுகையில், இலங்கையின் தற்போதைய சில்லறை விலையும் குறைவாக இருப்பதாக LIOC சுட்டிக்காட்டியுள்ளது.

சர்வதேச சந்தையில் கச்சா எண்ணெயின் விலை பீப்பாய் ஒன்றுக்கு சுமார் 105 அமெரிக்க டொலராகவும், பெட்ரோல் 145 அமெரிக்க டொலராகவும், டீசல் 170 முதல் 173 அமெரிக்க டொலர் வரையிலும் காணப்படுவதாக தெரிவிக்கப்பட்டுள்ளது.

எனினும், இலங்கையின் தற்போதைய டீசல் சில்லறை விலை சுமார் 125 அமெரிக்க டொலர் அளவிலான சர்வதேச விலைக்கு சமமானதாக இருப்பதாக LIOC குறிப்பிட்டுள்ளது.

இதனிடையே, இலங்கை எரிபொருள் சந்தையில் வெளிநாட்டு நிறுவனங்கள் சுமார் 35 சதவீத சந்தைப் பங்கைப் பெற்றுள்ளதால் அரசாங்கத்தின் நிதிச்சுமை குறைந்துள்ளதாகவும் கே. ரகு தெரிவித்துள்ளார். இருப்பினும், மானியங்கள் வழங்கப்படாத ஆரம்ப மூன்று மாதங்களில் அந்த நிறுவனங்களும் நஷ்டத்தை எதிர்கொண்டதாக அவர் கூறியுள்ளார்.

இதனால், எரிபொருள் விலையைத் திருத்துவதுடன், உண்மையான இறக்குமதி மற்றும் விநியோகச் செலவின் அடிப்படையில் விலையை நிர்ணயிக்கும் ‘Cost-Plus Pricing’ முறையை அறிமுகப்படுத்துவது தொடர்பிலும் கவனம் செலுத்த வேண்டும் என LIOC கோரியுள்ளது.

அடுத்த மூன்று மாதங்களுக்கு ரூ.41 பில்லியன் எரிபொருள் மானியம்

உலக சந்தையில் எரிபொருள் விலைகள் அதிகரித்துள்ள நிலையில், அதன் முழுச் சுமையையும் பொதுமக்கள் மீது சுமத்தாமல் இருப்பதற்காக அடுத்த மூன்று மாதங்களுக்கு சுமார் 41 பில்லியன் ரூபாய் எரிபொருள் மானியம் வழங்க அரசாங்கம் தீர்மானித்துள்ளதாக தகவல் திணைக்களம் தெரிவித்துள்ளது.

இதற்கான அமைச்சரவை அனுமதி பெறப்படவுள்ளதாகவும் தெரிவிக்கப்பட்டுள்ளது.

2026ஆம் ஆண்டு ஏப்ரல், மே மற்றும் ஜூன் மாதங்களில் டீசலுக்கு லீற்றருக்கு 100 ரூபாய் வரையிலும், பெட்ரோலுக்கு லீற்றருக்கு 20 ரூபாய் வரையிலும் அரசாங்கம் மானியம் வழங்கியிருந்தது. இதற்காக சுமார் 57 பில்லியன் ரூபாய் செலவிடப்பட்டதாக தெரிவிக்கப்பட்டுள்ளது.

2026 பெப்ரவரி மாதத்துடன் ஒப்பிடுகையில் சர்வதேச சந்தையில் டீசல் விலை சுமார் 78 சதவீதமும், பெட்ரோல் விலை சுமார் 92 சதவீதமும், Murban கச்சா எண்ணெயின் விலை சுமார் 66 சதவீதமும் அதிகரித்துள்ளதாக தெரிவிக்கப்பட்டுள்ளது.

எனினும், இலங்கையில் இதே காலப்பகுதியில் பெட்ரோல் விலை 36.2 சதவீதமும், டீசல் விலை 35.9 சதவீதமும் மட்டுமே அதிகரித்துள்ளதாக குறிப்பிடப்பட்டுள்ளது.

சர்வதேச சந்தையில் ஏற்பட்டுள்ள விலை அதிகரிப்பின் முழுச் சுமையையும் பொதுமக்கள் மீது சுமத்தாமல் கட்டுப்படுத்தும் நோக்கிலேயே அடுத்த மூன்று மாதங்களுக்கு 41 பில்லியன் ரூபாய் எரிபொருள் மானியம் வழங்க அரசாங்கம் நடவடிக்கை எடுப்பதாக தெரிவிக்கப்பட்டுள்ளது.