பொல்கஹாவெல–மஹாவ பயணிகள் ரயில் தடம் புரண்டது; பல ரயில்கள் தாமதம்.!!!
பொல்கஹாவெலையிலிருந்து மஹாவ நோக்கி பயணித்த பயணிகள் ரயிலொன்று, பொத்துஹேரா ரயில் நிலையத்தில் தடம் புரண்டு விபத்துக்குள்ளானதைத் தொடர்ந்து, வடக்கு ரயில் பாதையில் ரயில் சேவைகள் பாதிக்கப்பட்டுள்ளன.
இந்த திடீர் விபத்தினால் பொத்துஹேரா ரயில் நிலையத்தை கடந்து வடக்கு வழித்தடத்தில் பயணிக்கும் ரயில்கள் தாமதத்தை எதிர்நோக்கி வருவதாக தெரிவிக்கப்படுகிறது.
விபத்துக்குள்ளான ரயிலை அகற்றி, பாதையை மீளமைக்கும் பணிகள் தீவிரமாக முன்னெடுக்கப்பட்டு வருகின்றன. ரயில் சேவைகளை வழமை நிலைக்குக் கொண்டுவரும் நடவடிக்கைகளில் சம்பந்தப்பட்ட அதிகாரிகள் ஈடுபட்டு வருகின்றனர்.
இதனிடையே, வடக்கு ரயில் பாதையில் பயணம் செய்யத் திட்டமிட்டுள்ள பயணிகள் தங்களது பயணங்களை மேற்கொள்ளும் முன்னர் ரயில் சேவை தொடர்பான அறிவிப்புகளை கவனத்தில் கொண்டு, பயணத் திட்டங்களை அதற்கேற்ப மாற்றிக்கொள்ளுமாறு அறிவுறுத்தப்பட்டுள்ளனர்.
ரயில் பாதை சீரமைப்பு பணிகள் நிறைவடைந்த பின்னர் சேவைகள் வழமை நிலைக்குத் திரும்பும் என எதிர்பார்க்கப்படுகிறது.
