மத்திய ஆப்பிரிக்காவில் 14 பேரை உயிருடன் மீட்ட இலங்கை விமானப்படை; உலக அரங்கில் மீண்டும் ஒளிர்ந்த வீரச்செயல்.!!!

மத்திய ஆப்பிரிக்கக் குடியரசில் ஐக்கிய நாடுகள் சபையின் MINUSCA அமைதிப்படைப் பணியில் ஈடுபட்டுள்ள இலங்கை விமானப்படை, கடுமையான எதிரித்தாக்குதல்களுக்கு மத்தியிலும் 14 பேரை பாதுகாப்பாக மீட்ட மனிதாபிமான மீட்பு நடவடிக்கையை வெற்றிகரமாக நிறைவேற்றி சர்வதேச அளவில் பாராட்டைப் பெற்றுள்ளது.

கடந்த ஜூன் 30 ஆம் திகதி, மத்திய ஆப்பிரிக்கக் குடியரசின் அம் தஃபோக் பகுதியில் அமைதிப்படை ரோந்துப் பணியில் ஈடுபட்டிருந்த சாம்பியா நாட்டுப் படையினர் மீது அடையாளம் தெரியாத ஆயுதக் குழுவினர் தாக்குதல் நடத்தியதில் பல சிப்பாய்கள், பொதுமக்கள் மற்றும் பாதுகாப்புப் படையினர் காயமடைந்தனர்.

காயமடைந்தவர்களை மீட்க முதற்கட்டமாக பாகிஸ்தான் விமானப்படை ஹெலிகாப்டரை அனுப்ப முயற்சிக்கப்பட்ட போதிலும், மோசமான வானிலை காரணமாக அது சாத்தியமாகவில்லை. இதையடுத்து, மீட்புப் பொறுப்பு இலங்கை விமானப்படைக்கு ஒப்படைக்கப்பட்டது.

நிலைமையின் அவசரத்தைக் கருத்தில் கொண்டு, இலங்கை விமானப்படை விமானப்பிரிவின் கட்டளை அதிகாரி குரூப் கேப்டன் அசிரி பத்திரகே தலைமையில், UNO 325P Mi-17 ரக ஹெலிகாப்டர் மூலம் மீட்பு நடவடிக்கை உடனடியாக ஆரம்பிக்கப்பட்டது.

ஃபிளைட் லெப்டினன்ட் தில்ஹாஷ் அத்தப்பத்து துணை விமானியாகவும், விமானப் பொறியாளர்கள், வான் துப்பாக்கி வீரர்கள் மற்றும் வான்வழி மருத்துவ மீட்புக் குழுவினரும் இந்த ஆபத்தான பணியில் இணைந்திருந்தனர்.

சண்டை தீவிரமடைந்த நிலையில், கூடுதல் படையினரை ஏற்றிச் செல்லும் திட்டம் கைவிடப்பட்டு, ஹெலிகாப்டர் நேரடியாக போர்ப்பகுதிக்குள் செலுத்தப்பட்டது. இரண்டு மணி நேரத்திற்கும் மேலான பயணத்திற்குப் பிறகு, கடுமையான துப்பாக்கிச் சூடு நிலவிய பகுதியில் ஹெலிகாப்டர் சென்றடைந்தது.

தரையிறங்குவதற்கே பாதுகாப்பற்ற சூழல் நிலவிய போதிலும், இயந்திரங்களை நிறுத்தாமல் மிகக் குறுகிய நேரத்தில் காயமடைந்த 14 பேரை விமானத்தில் ஏற்றி பாதுகாப்பான இடத்திற்குக் கொண்டு சென்றனர்.

பயணத்தின் முழு நேரத்திலும், இலங்கை விமானப்படையின் வான்வழி மருத்துவ மீட்புக் குழுவினர் குறைந்த வசதிகளுடன் காயமடைந்தோரின் உயிரைக் காப்பாற்ற அயராது மருத்துவச் சேவைகளை வழங்கினர்.

இந்த மீட்பு நடவடிக்கை, ஐக்கிய நாடுகள் அமைதிப்படை விமானப் போக்குவரத்து வரலாற்றில் ஒரே அவசர நடவடிக்கையின் மூலம் 14 பேரை வெற்றிகரமாக மீட்ட முதல் சம்பவமாக பதிவாகியுள்ளது.

இலங்கை விமானப்படை வீரர்களின் தைரியம், அர்ப்பணிப்பு மற்றும் தொழில்முறை திறனை ஐக்கிய நாடுகள் அமைதிப்படையின் படைத்தளபதி உயர்ந்து பாராட்டியுள்ளதுடன், இந்த வீரச்செயல் சர்வதேச அரங்கில் இலங்கை ஆயுதப்படைகளின் நம்பகத்தன்மையையும் நற்பெயரையும் மேலும் வலுப்படுத்தியுள்ளதாக தெரிவிக்கப்பட்டுள்ளது.