முச்சக்கர வண்டியில் கர்ப்பிணி ஆடு உட்பட மூன்று ஆடுகளை கொடூரமாக ஏற்றிச் சென்ற மூவர் கைது.!!!
விலங்குகளுக்கு கொடுமை ஏற்படும் வகையில் கர்ப்பிணி பெண் ஆடு ஒன்றும், மேலும் இரண்டு ஆடுகளும் சேர்த்து மொத்தம் மூன்று ஆடுகளை மனிதாபிமானமற்ற முறையில் முச்சக்கர வண்டியில் ஏற்றிச் சென்ற மூவர் நேற்று (01) அட்டம்பிட்டிய பொலிஸாரால் கைது செய்யப்பட்டுள்ளனர்.
கைது செய்யப்பட்டவர்கள் பதுளை மற்றும் ஹாலிஎல–திக்குவெல்ல பகுதிகளைச் சேர்ந்த 34, 52 மற்றும் 63 வயதுடையவர்கள் என பொலிஸார் தெரிவித்தனர்.
ஹாலிஎல–திக்குவெல்ல பகுதியில் இருந்து பல ஆடுகளை ஏற்றிச் சென்ற டீசல் முச்சக்கர வண்டி தொடர்பில் கிடைத்த தகவலின் அடிப்படையில் மேற்கொள்ளப்பட்ட சோதனையின் போது, முச்சக்கர வண்டியின் பின்புற சிறிய இடத்தில் ஆடுகளின் கால்கள் கட்டப்பட்டு, ஒன்றின் மேல் ஒன்றாக அடுக்கப்பட்டு மிகக் கொடூரமான நிலையில் ஏற்றிச் செல்லப்பட்டமை கண்டறியப்பட்டது. அவற்றில் ஒன்று கர்ப்பிணி பெண் ஆடாகவும் இருந்தது.
இதையடுத்து, சந்தேகநபர்களும் முச்சக்கர வண்டியும் அட்டம்பிட்டிய பொலிஸ் நிலையத்திற்கு கொண்டு செல்லப்பட்டன. பின்னர், மூவரும் எதிர்வரும் நாளில் வெலிமடை நீதவான் நீதிமன்றத்தில் ஆஜராகுமாறு அறிவிக்கப்பட்டு, பொலிஸ் பிணையில் விடுவிக்கப்பட்டனர்.
மீட்கப்பட்ட ஆடுகள் பொலிஸ் பாதுகாப்பில் வைக்கப்பட்டுள்ளதுடன், கால்நடை வைத்திய அதிகாரிகளிடம் ஒப்படைக்கப்பட்டு மருத்துவ அறிக்கை பெறுவதற்கான நடவடிக்கைகள் முன்னெடுக்கப்பட்டு வருகின்றன.
ஊவா மாகாண மூத்த பிரதிப் பொலிஸ் மா அதிபர் மகேஷ் சேனாரத்ன உள்ளிட்ட உயர் பொலிஸ் அதிகாரிகளின் ஆலோசனையின் பேரில், அட்டம்பிட்டிய பொலிஸார் மேலதிக விசாரணைகளை மேற்கொண்டு வருகின்றனர்.
