அமெரிக்கா – ஈரான் பதற்றம்: போர் பாதையா அல்லது சமாதான வாய்ப்பா.???

அமெரிக்கா மற்றும் ஈரான் இடையிலான அரசியல் மற்றும் இராணுவ பதற்றம் உலக அரசியலில் மீண்டும் முக்கியமான விவாதமாக மாறியுள்ளது. பல ஆண்டுகளாக நீடித்து வரும் இந்த மோதல் தற்போது புதிய கட்டத்தை எட்டியுள்ளது.

பாகிஸ்தான் தலைநகர் இஸ்லாமாபாத்தில் நடைபெற்ற உயர்மட்ட நேரடி பேச்சுவார்த்தை எந்த இறுதி உடன்பாடும் எட்டப்படாமல் முடிவடைந்துள்ளதால், எதிர்காலத்தில் இந்த பிரச்சினை எந்த திசையை நோக்கி நகரும் என்பது குறித்து சர்வதேச சமூகத்தில் பல்வேறு கேள்விகள் எழுந்துள்ளன.

இஸ்லாமாபாத்தில் நடைபெற்ற இந்த முக்கியமான பேச்சுவார்த்தை சுமார் 14 முதல் 21 மணி நேரம் வரை நீடித்ததாக கூறப்படுகிறது. 1979 ஆம் ஆண்டுக்குப் பிறகு அமெரிக்கா மற்றும் ஈரான் இடையே நடைபெற்ற மிக உயர்மட்ட நேரடி சந்திப்பாக இது கருதப்படுகிறது. பல முக்கியமான அரசியல் மற்றும் பாதுகாப்பு தொடர்பான விடயங்கள் இதில் விவாதிக்கப்பட்டிருந்தாலும், இரு தரப்பும் ஏற்றுக்கொள்ளக்கூடிய இறுதி தீர்வை எட்ட முடியவில்லை.

இந்தப் பேச்சுவார்த்தையின் மையமாக இருந்தது ஈரானின் அணு திட்டம். ஈரான் அணு ஆயுதங்களை உருவாக்காது என்பதற்கான “அடிப்படை உறுதிப்பாட்டை” அமெரிக்கா கோரியது. உலக பாதுகாப்பை கருத்தில் கொண்டு இது அவசியமான நிபந்தனை என அமெரிக்கா வலியுறுத்தியது. ஆனால், தனது இறையாண்மை மற்றும் அணுசக்தி தொடர்பான உரிமைகளை விட்டுக்கொடுக்க முடியாது என ஈரான் உறுதியாக தெரிவித்தது. இதுவே பேச்சுவார்த்தையின் முன்னேற்றத்தை தடுக்கும் முக்கிய காரணமாக அமைந்தது.

இதனுடன், உலகளாவிய எண்ணெய் போக்குவரத்துக்கு மிகவும் முக்கியமான ஹோர்முஸ் ஜலசந்தி விவகாரமும் முக்கிய இடம் பெற்றது. உலக எண்ணெய் விநியோகத்தின் ஒரு பெரிய பகுதி இந்த கடல்வழிப் பாதையின் மூலமாகவே செல்கிறது. இதனால், இந்த பாதை மூடப்பட்டால் உலக பொருளாதாரத்துக்கு பெரிய பாதிப்பு ஏற்படும் அபாயம் உள்ளது. இதனை உடனடியாகத் திறக்க அமெரிக்கா வலியுறுத்தியபோதிலும், நிரந்தர அமைதி ஒப்பந்தம் இல்லாமல் அதைத் திறக்க முடியாது என ஈரான் தெரிவித்துள்ளது.

பேச்சுவார்த்தை தோல்வியடைந்ததற்கான காரணங்களைப் பற்றி இரு நாடுகளும் ஒருவரையொருவர் குற்றம் சாட்டுகின்றன. அமெரிக்க துணை அதிபர் ஜே.டி. வான்ஸ், அமெரிக்காவின் நியாயமான நிபந்தனைகளை ஏற்க ஈரான் மறுத்துவிட்டதாக கூறினார். அதேவேளை, அமெரிக்கா சட்டவிரோதமான மற்றும் அதீதமான கோரிக்கைகளை முன்வைத்ததாக ஈரான் குற்றஞ்சாட்டியுள்ளது.

இந்த பதற்றமான சூழ்நிலையில் ராணுவ நடவடிக்கைகள் பற்றிய தகவல்களும் வெளியாகியுள்ளன. இரண்டு அமெரிக்கப் போர்க்கப்பல்கள் ஹோர்முஸ் ஜலசந்தியை கடந்ததாக அமெரிக்கா தெரிவித்துள்ளது. ஆனால், அந்த தகவலை ஈரான் மறுத்ததுடன், எந்தவொரு அத்துமீறலுக்கும் கடுமையான பதிலடி வழங்கப்படும் என எச்சரித்துள்ளது.

அமெரிக்க அதிபர் டொனால்ட் டிரம்ப் வெளியிட்ட கருத்தும் கவனத்தை ஈர்த்துள்ளது. உடன்பாடு எட்டப்படுகிறதா இல்லையா என்பது தமக்கு முக்கியமில்லை என்றும், எந்த நிலையிலும் அமெரிக்கா ஏற்கனவே வெற்றி பெற்றுவிட்டதாகவும் அவர் தெரிவித்துள்ளார். இந்த கருத்து அரசியல் வட்டாரங்களில் பல்வேறு விமர்சனங்களையும் விவாதங்களையும் உருவாக்கியுள்ளது.

எனினும், பேச்சுவார்த்தை முற்றிலும் முடிவடைந்துவிட்டதாக கூற முடியாது. தொழில்நுட்ப வல்லுநர்கள் தொடர்ந்து ஆவணங்களை பரிமாறிக்கொள்வார்கள் என்றும், எதிர்காலத்தில் மீண்டும் பேச்சுவார்த்தை நடைபெற வாய்ப்பு இருப்பதாகவும் தகவல்கள் வெளியாகியுள்ளன. இந்த முயற்சிகளில் பாகிஸ்தான் தனது மத்தியஸ்தப் பணியைத் தொடர்ந்து மேற்கொள்ளும் என எதிர்பார்க்கப்படுகிறது.

உலக அரசியல், பாதுகாப்பு மற்றும் பொருளாதார நிலைத்தன்மை ஆகியவை இந்த பிரச்சினையின் முன்னேற்றத்தைப் பெரிதும் சார்ந்திருக்கின்றன. அமெரிக்கா – ஈரான் மோதல் மேலும் தீவிரமடைந்தால் அது மத்திய கிழக்கு பிராந்தியத்திற்கே அல்லாமல் உலகளாவிய அளவிலும் தாக்கத்தை ஏற்படுத்தும்.

எனவே, இந்த பதற்றமான சூழ்நிலையில் இரு நாடுகளும் ராணுவ மோதலை விட தூதரக பேச்சுவார்த்தைகளின் வழியைத் தேர்வு செய்வது உலக சமாதானத்திற்கும் பொருளாதார நிலைத்தன்மைக்கும் மிக அவசியமானதாகும்.

✍ எம்.ரி.எம் —