இலங்கை வரலாற்றில் புதிய வருமான சாதனை; 9 மாதங்களில் ரூ.2,040 பில்லியன் வரி வசூல்.!!!
இலங்கை உள்நாட்டு இறைவரித் திணைக்களம் 2026ஆம் ஆண்டு செப்டெம்பர் 30ஆம் திகதி வரையான காலப்பகுதியில் ரூ.2,040 பில்லியன் வரி வருமானத்தை ஈட்டியுள்ளதாக தெரிவிக்கப்பட்டுள்ளது.
இதன்படி, 2026ஆம் ஆண்டுக்காக திணைக்களத்திற்கு நிர்ணயிக்கப்பட்டுள்ள வருடாந்த வருமான இலக்கில் 85 சதவீதம் ஏற்கனவே எட்டப்பட்டுள்ளது.
கடந்த 2025ஆம் ஆண்டின் முதல் ஒன்பது மாதங்களில் ரூ.1,642 பில்லியன் வருமானம் சேகரிக்கப்பட்டிருந்த நிலையில், இவ்வாண்டின் இதே காலப்பகுதியில் ரூ.398 பில்லியன் அதிகமாக வரி வருமானம் சேகரிக்கப்பட்டுள்ளது.
இது கடந்த ஆண்டின் இதே காலப்பகுதியுடன் ஒப்பிடுகையில் 24 சதவீத வருடாந்த அதிகரிப்பாகும்.
மேலும், 2026ஆம் ஆண்டின் முதல் மூன்று காலாண்டுகளிலேயே உள்நாட்டு இறைவரித் திணைக்களம் ரூ.2 ட்ரில்லியனுக்கும் அதிகமான வரி வருமானத்தை சேகரித்துள்ளமை குறிப்பிடத்தக்கது.
திணைக்களம் இதுவரை எட்டியுள்ள 85 சதவீத இலக்கு அடைவை அடிப்படையாகக் கொண்டு கணக்கிடுகையில், 2026ஆம் ஆண்டுக்கான முழுமையான வருமான இலக்கு சுமார் ரூ.2.4 ட்ரில்லியன் என மதிப்பிடப்படுகிறது.
