ஸ்ரீலங்கா முஸ்லிம் காங்கிரஸின் தேசியப் பட்டியல் எம்.பி. அப்துல் வாஹித் ராஜினாமா.!!!
ஸ்ரீலங்கா முஸ்லிம் காங்கிரஸின் (SLMC) தேசியப் பட்டியல் நாடாளுமன்ற உறுப்பினர் எம்.எஸ். அப்துல் வாஹித், தனது நாடாளுமன்ற உறுப்பினர் பதவியை ராஜினாமா செய்துள்ளார்.
அவரது ராஜினாமா இன்று (14) முதல் அமுலுக்கு வரும் வகையில், நாடாளுமன்றத்தின் பதில் செயலாளர் நாயகம் ஹன்ச அபேரத்னவினால் தேர்தல்கள் ஆணைக்குழுவிற்கு உத்தியோகபூர்வமாக அறிவிக்கப்பட்டுள்ளது.
அப்துல் வாஹித்தின் ராஜினாமாவைத் தொடர்ந்து, 10ஆவது நாடாளுமன்றத்தில் தேசியப் பட்டியல் உறுப்பினர் பதவியொன்று வெற்றிடமாகியுள்ளதாக தேர்தல்கள் ஆணைக்குழுவின் தவிசாளருக்கு அறிவிக்கப்பட்டுள்ளது.
1981ஆம் ஆண்டின் 1ஆம் இலக்க நாடாளுமன்றத் தேர்தல்கள் சட்டத்தின் 64(5)ஆம் பிரிவுக்கு அமைவாக, இந்த வெற்றிடம் தொடர்பான அறிவித்தல் தேர்தல்கள் ஆணைக்குழுவிற்கு அனுப்பப்பட்டுள்ளது.
இதனையடுத்து, காலியாகியுள்ள தேசியப் பட்டியல் நாடாளுமன்ற உறுப்பினர் பதவியை நிரப்புவதற்கான சட்டபூர்வ நடவடிக்கைகளை தேர்தல்கள் ஆணைக்குழு முன்னெடுக்கவுள்ளதாக தெரிவிக்கப்பட்டுள்ளது.
அப்துல் வாஹித்தின் ராஜினாமாவைத் தொடர்ந்து, ஸ்ரீலங்கா முஸ்லிம் காங்கிரஸின் சார்பில் குறித்த தேசியப் பட்டியல் இடத்திற்கு அடுத்ததாக யார் நியமிக்கப்படுவார் என்பது அரசியல் வட்டாரங்களில் கவனம் பெற்றுள்ளது.
