பௌத்த மதத்திற்குச் சிறுபான்மை மக்கள் எதிரிகள் அல்ல; இனவாதத்தைப் பரப்பும் சிலரே அதன் எதிரிகள் – சீலரத்ன தேரர்.!!!
பௌத்தத்தைப் பாதுகாக்க வேண்டுமெனில் முதலில் மனிதநேயத்தைப் பாதுகாக்க வேண்டும்; மதத்தை அரசியலுக்குப் பயன்படுத்த வேண்டாம் எனவும் வலியுறுத்தல்
பௌத்த மதத்திற்குச் சிறுபான்மை இன மக்களால் எவ்வித அச்சுறுத்தலும் இல்லை எனத் தெரிவித்துள்ள சீலரத்ன தேரர், பௌத்தத்தின் பெயரால் இனவாதத்தையும் மதவெறியையும் பரப்பும் சிலரே பௌத்த மதத்தின் உண்மையான அடையாளத்திற்குக் களங்கம் ஏற்படுத்துவதாகக் குறிப்பிட்டுள்ளார்.
பௌத்த மதத்தைப் பாதுகாக்க வேண்டுமெனில் முதலில் இனவாதத்தையும் வெறுப்பையும் விதைக்கும் சில பிக்குகளின் செயற்பாடுகளிலிருந்து அதனைப் பாதுகாக்க வேண்டும் என்றும் அவர் வலியுறுத்தியுள்ளார்.
பௌத்த மதத்தின் அடிப்படைப் பண்புகளான கருணை, அன்பு, இரக்கம், அமைதி மற்றும் மனிதநேயம் ஆகியவற்றுக்கு முன்னுரிமை வழங்கப்பட வேண்டும். பிற சமூகங்களுடன் ஒற்றுமையாக வாழ்வதையும், ஒழுக்கத்தையும் போதிப்பதையும் பௌத்த மதத்தின் முக்கிய நோக்கங்களாகக் கொள்ள வேண்டும். மதத்தையும் அரசியலையும் ஒன்றாகக் கலக்கக்கூடாது என்றும் அவர் தெரிவித்துள்ளார்.
மேலும், கடந்த கால அரசியல் சூழல்களை நினைவுபடுத்திய அவர், மஹிந்த ராஜபக்ஷவின் ஆட்சிக்காலத்தில் தமிழ், முஸ்லிம் மக்களுக்கு எதிராக உருவாக்கப்பட்ட வெறுப்புணர்வு மற்றும் சமூகப் பிரிவினைகள் தொடர்பிலும் கேள்வி எழுப்பியுள்ளார்.
அன்றைய காலகட்டத்தில் சிறுபான்மை மக்களின் ஆதரவு தேவையற்றதாகக் கருதப்பட்ட நிலையில், இன்று அவர்களின் ஆதரவு ஏன் தேவைப்படுகின்றது என்றும் அவர் கேள்வி எழுப்பியுள்ளார்.
பௌத்த மதத்திற்குச் சிறுபான்மை மக்களால் அச்சுறுத்தல் இல்லை. மாறாக, சில பிக்குகளின் செயற்பாடுகளே மதத்தின் நற்பெயருக்குக் களங்கம் ஏற்படுத்துவதாகக் குறிப்பிட்ட அவர், இவ்வாறானவர்களை அடையாளம் கண்டு உரிய ஒழுக்காற்று நடவடிக்கைகளை எடுக்க வேண்டியது சம்பந்தப்பட்ட தரப்பினரின் பொறுப்பு என்றும் சுட்டிக்காட்டியுள்ளார்.
அத்துடன், ஞானசார தேரரை விடுவிப்பதற்காகவோ அல்லது அரசியல் செல்வாக்கைப் பயன்படுத்தி நாட்டின் சட்டத்தையும் நீதித்துறையையும் மாற்றியமைப்பதற்காகவோ பௌத்த மதத்தைப் பயன்படுத்தக்கூடாது எனவும் தெரிவித்துள்ளார்.
மக்கள் மதிக்க விரும்புவது இனவாதத்தைப் பேசும் ஒருவரையல்ல; உண்மையான நல்ல துறவியையே எனக் குறிப்பிட்ட அவர், சட்டத்தையும் நீதியையும் மதிப்பது அனைவரினதும் பொறுப்பாகும் என்றும் தெரிவித்துள்ளார்.
தமது ஆதரவு நல்லிணக்கம், நீதி மற்றும் மனிதநேயத்திற்கே தவிர, அநீதி மற்றும் இனவாதத்திற்கு ஒருபோதும் கிடையாது எனவும் அவர் குறிப்பிட்டுள்ளார்.
அதேவேளை, அனுரகுமார திஸாநாயக்கவின் வருகையுடன் நாட்டில் மாற்றத்திற்கான புதிய நம்பிக்கை உருவாகியுள்ளதாகக் குறிப்பிட்ட அவர், அந்த மாற்றம் ஒரு இனத்திற்கோ அல்லது ஒரு சமூகத்திற்கோ மட்டுப்படுத்தப்படாமல் ஒட்டுமொத்த நாட்டிற்குமானதாக இருக்க வேண்டும் என்றும் தெரிவித்துள்ளார்.
இறுதியாக, சிங்கள மக்கள் மட்டுமே நாட்டை ஆள வேண்டுமா எனக் கேள்வி எழுப்பிய அவர், தமிழ் மற்றும் முஸ்லிம் மக்களுக்கும் நாட்டை ஆளும் வாய்ப்பை வழங்கிப் பார்க்க வேண்டும் எனத் தெரிவித்துள்ளார்.
பௌத்த மதத்தைப் பாதுகாக்க விரும்பினால் முதலில் மனிதநேயத்தைப் பாதுகாக்கக் கற்றுக்கொள்ள வேண்டும். மதத்தை அரசியலுக்குப் பயன்படுத்துவதையும், அரசியலை மதத்தின் பின்னால் மறைப்பதையும் தவிர்க்க வேண்டும் என்பதே தனது நிலைப்பாடு என சீலரத்ன தேரர் வலியுறுத்தியுள்ளார்.
