2.88% மின்சாரக் கட்டண உயர்வுக்குக் கோரிக்கை: 1.46% உயர்வுக்கு இலங்கை பொதுப் பயன்பாடுகள் ஆணைக்குழு பரிந்துரை; இறுதி முடிவு நாளை.!!!
• 2026ஆம் ஆண்டின் நான்காம் காலாண்டுக்கான மின்சாரக் கட்டணத் திருத்தம் தொடர்பில் நாளை (05) தீர்மானம்.
2026ஆம் ஆண்டின் நான்காம் காலாண்டுக்கான மின்சாரக் கட்டணத்தை 2.88 சதவீதத்தால் அதிகரிக்குமாறு தேசிய முறைமை இயக்குநர் (NSO) கோரிக்கை விடுத்துள்ளார்.
எனினும், இலங்கை பொதுப் பயன்பாடுகள் ஆணைக்குழு (PUCSL) மேற்கொண்ட ஆரம்பகட்ட ஆய்வுகளின் அடிப்படையில், 1.46 சதவீத மின்சாரக் கட்டண உயர்வை மாத்திரம் தற்காலிகமாகப் பரிந்துரைத்துள்ளது.
மின் உற்பத்திச் செலவுகள் மற்றும் தரம் குறைந்த நிலக்கரிப் பயன்பாட்டினால் ஏற்பட்டதாகக் குறிப்பிடப்படும் மேலதிக செலவுகள் தொடர்பில் NSO முன்வைத்த கோரிக்கைகளை ஆணைக்குழு மீளாய்வு செய்ததையடுத்து, முன்மொழியப்பட்ட கட்டண உயர்வு வீதம் குறைக்கப்பட்டுள்ளதாகத் தெரிவிக்கப்படுகிறது.
இந்நிலையில், மின்சாரக் கட்டணத் திருத்தம் தொடர்பான இறுதி முடிவு நாளை (நவம்பர் 5) நடைபெறவுள்ள பொதுமக்கள் மற்றும் சம்பந்தப்பட்ட தரப்பினரின் கருத்தறியும் அமர்வின் பின்னர் அறிவிக்கப்படும் என இலங்கை பொதுப் பயன்பாடுகள் ஆணைக்குழு தெரிவித்துள்ளது.
இதனால், இம்முறை மின்சாரக் கட்டணத்தில் மாற்றம் ஏற்படுமா, அவ்வாறு ஏற்பட்டால் அதன் வீதம் எவ்வளவாக இருக்கும் என்பது தொடர்பான இறுதி அறிவிப்பை பொதுமக்கள் எதிர்பார்த்துள்ளனர்.
