ஜிபூட்டியில் அகதிப் படகு கவிழ்ந்து கோர விபத்து; 109 பேர் பலி, 116 பேர் மாயம்.!!!
• 300-க்கும் மேற்பட்டோர் பயணித்த படகு கடலில் கவிழ்ந்தது; 80-க்கும் மேற்பட்டோர் உயிர் தப்பினர்.
ஆப்பிரிக்க நாடான ஜிபூட்டியின் கிழக்குக் கடற்கரைப் பகுதியில் இருந்து ஏமன் நோக்கிப் பயணித்த அகதிப் படகு கவிழ்ந்ததில் குறைந்தது 109 பேர் உயிரிழந்துள்ளதாக ஐக்கிய நாடுகள் சபையின் சர்வதேச இடம்பெயர்வு அமைப்பான (IOM) தெரிவித்துள்ளது.
கடந்த ஒக்டோபர் 8ஆம் திகதி இரவு முதல் 9ஆம் திகதி அதிகாலை வரையான காலப்பகுதியில், ஜிபூட்டியின் குஹேரே (Guhere) பகுதிக்கு அருகில், ஓபொக் (Obock) நகருக்கு வடக்கே இந்த விபத்து இடம்பெற்றுள்ளதாகத் தெரிவிக்கப்படுகிறது.
குறித்த படகில் 305 முதல் 350 பேர் வரை பயணித்திருக்கலாம் என சர்வதேச ஊடகங்கள் தெரிவித்துள்ளன. விபத்தில் 109 பேர் உயிரிழந்துள்ளதுடன், குறைந்தது 116 பேர் காணாமல் போயுள்ளதாகவும், 80க்கும் மேற்பட்டோர் உயிர் தப்பியுள்ளதாகவும் ஆரம்பகட்ட தகவல்கள் தெரிவிக்கின்றன.
ஜிபூட்டியிலிருந்து ஏமன் நோக்கிச் செல்லும் கடல்வழிப் பாதை, ஆப்பிரிக்காவிலிருந்து வளைகுடா நாடுகளை நோக்கி வேலைவாய்ப்புகளையும் பாதுகாப்பையும் தேடிச் செல்லும் குடியேறிகள் பயன்படுத்தும் முக்கிய பாதைகளில் ஒன்றாகும்.
வறுமை, வேலைவாய்ப்பின்மை, பாதுகாப்பின்மை மற்றும் மோதல்கள் காரணமாகப் பலர் இத்தகைய ஆபத்தான கடற்பயணங்களை மேற்கொள்கின்றனர். அதிக எண்ணிக்கையிலான பயணிகளை ஏற்றிச் செல்லும் பாதுகாப்பற்ற படகுகள் இவ்வாறான விபத்துகளின் அபாயத்தை மேலும் அதிகரிக்கின்றன.
காணாமல் போனவர்களைத் தேடும் நடவடிக்கைகள் மற்றும் உயிரிழப்புகள் தொடர்பான மேலதிக தகவல்கள் எதிர்பார்க்கப்படுகின்றன. இந்தத் துயரச் சம்பவம், பாதுகாப்பற்ற குடியேற்றப் பயணங்களால் ஏற்படும் மனித உயிரிழப்புகள் குறித்த கவலையை மீண்டும் எழுப்பியுள்ளது.
