ஜப்பானில் வரலாறு காணாத கனமழை – நிலைமை கவலைக்கிடம்.!!!

• இசு தீவுகள் உள்ளிட்ட பல பகுதிகளில் வெள்ளம், நிலச்சரிவு அபாயம் – ஒருவர் உயிரிழப்பு.

ஜப்பானின் பல பகுதிகளில் பெய்து வரும் கனமழையால் வெள்ளம் மற்றும் நிலச்சரிவு அபாயம் அதிகரித்துள்ள நிலையில், அடுத்த 24 முதல் 48 மணி நேரம் மிகவும் முக்கியமானதாக இருக்கும் என எச்சரிக்கை விடுக்கப்பட்டுள்ளது.

இசு தீவுகளில் கடந்த சில நாட்களாக மிக அதிகளவிலான மழை பதிவாகியுள்ளது. குறிப்பாக, இசு ஓஷிமா தீவில் 72 மணி நேரத்தில் 768.5 மில்லிமீற்றர் மழை பதிவாகியுள்ளதாக ஜப்பான் வானிலைத் தகவல்கள் தெரிவிக்கின்றன.

முன்னதாக இசு ஓஷிமா, நிஜிமா மற்றும் தோஷிமா பகுதிகளில் மிக உயர்ந்த Level 5 நிலச்சரிவு அவசர எச்சரிக்கை விடுக்கப்பட்டிருந்தது. செப்டம்பர் 8 அதிகாலை அது Level 4 அபாய எச்சரிக்கையாகக் குறைக்கப்பட்ட போதிலும், நிலச்சரிவு அபாயம் தொடர்ந்து காணப்படுவதாக அதிகாரிகள் எச்சரித்துள்ளனர்.

மழை குறைந்த பின்னரும் நிலம் தளர்ந்த நிலையில் இருப்பதால், திடீர் நிலச்சரிவுகள் ஏற்படக்கூடும் என எச்சரிக்கை விடுக்கப்பட்டுள்ளது.

பல பகுதிகளிலும் கனமழை அபாயம்: இசு தீவுகளுக்கு அப்பால் காந்தோ, டோகாய், கின்கி மற்றும் ஷிகோகு உள்ளிட்ட பகுதிகளிலும் கனமழை தொடரும் அபாயம் காணப்படுகிறது.

குறிப்பாக செப்டம்பர் 8 இரவு முதல் 9ஆம் தேதி காலை வரை சில பகுதிகளில் தொடர்ச்சியாக கனமழையை உருவாக்கக்கூடிய “Linear Rainband” உருவாகும் வாய்ப்பு இருப்பதாக ஜப்பான் வானிலை நிறுவனம் எச்சரித்துள்ளது.

வெள்ளம் – ஆறுகளில் நீர்மட்டம் உயர்வு: கனமழை காரணமாக தாழ்வான பகுதிகளில் வெள்ளப்பெருக்கு ஏற்படும் அபாயமும், ஆறுகளில் நீர்மட்டம் வேகமாக உயர்ந்து கரைபுரண்டு ஓடும் அபாயமும் அதிகரித்துள்ளது.

குறிப்பாக காந்தோ மற்றும் இசு தீவுகளில் ஏற்கனவே மண் தளர்ந்துள்ளதால், மேலும் மழை பெய்தால் நிலச்சரிவு மற்றும் வெள்ள அபாயம் மேலும் தீவிரமடையக்கூடும் என எச்சரிக்கப்பட்டுள்ளது.

ரயில் சேவைகளும் பாதிப்பு: கனமழையின் தாக்கத்தால் பல பகுதிகளில் ரயில் சேவைகள் தாமதமடைந்ததுடன், சில சேவைகள் இடைநிறுத்தப்பட்டுள்ளன.

மேலும், Shinkansen ரயில் சேவைகளிலும் முன்னதாக தாமதங்கள் ஏற்பட்டதாகத் தெரிவிக்கப்பட்டுள்ளது.

ஃபுகுஷிமாவில் ஒருவர் உயிரிழப்பு: கனமழையுடன் தொடர்புடைய சம்பவத்தில் ஃபுகுஷிமா பகுதியில் ஒருவர் உயிரிழந்துள்ளதாக தகவல்கள் தெரிவிக்கின்றன.

அடுத்த 24–48 மணி நேரம் முக்கியமானது: ஜப்பான் வானிலை நிறுவனத்தின் எச்சரிக்கையின்படி, செப்டம்பர் 9 வரை கிழக்கு ஜப்பானில் நிலச்சரிவு, தாழ்வான பகுதிகளில் வெள்ளப்பெருக்கு மற்றும் ஆறுகளில் நீர்மட்ட உயர்வு தொடர்பில் மக்கள் மிகுந்த அவதானத்துடன் இருக்க வேண்டுமென அறிவுறுத்தப்பட்டுள்ளது.

குறிப்பாக டோகாய் பகுதியில் Linear Rainband உருவாகக்கூடிய சூழ்நிலை காணப்படுவதால், கனமழையின் தாக்கம் மேலும் அதிகரிக்கக்கூடும் என எதிர்பார்க்கப்படுகிறது.