ஈரான் உச்ச தலைவரின் உடல்நிலை குறித்து பரபரப்பு; இஸ்ரேலிய ஊடகங்கள் வெளியிட்ட அதிர்ச்சி தகவல்.!!!
ஈரானின் உச்ச தலைவர் மொஜ்தபா கமேனி கவலைக்கிடமான நிலையில் மருத்துவமனையில் அனுமதிக்கப்பட்டுள்ளதாக இஸ்ரேலிய ஊடகங்கள் செய்தி வெளியிட்டுள்ளன.
அவர் மிகவும் கவலைக்கிடமான நிலையில் இருப்பதாகவும், ஈரான் ஆட்சியின் உயர்மட்ட வட்டாரங்களில் இது தொடர்பாக பரவலாக பேசப்பட்டு வருவதாகவும் இஸ்ரேலிய செய்தி நிறுவனங்கள் தெரிவித்துள்ளன.
மேற்கோளிட்டதாகக் கூறப்படும் ஒரு வட்டாரம், “அவர் வீரமரணம் அடைந்த செய்தி விரைவில் வெளியாகினாலும் நாங்கள் ஆச்சரியப்பட மாட்டோம்” என தெரிவித்ததாக செய்தி வெளியாகியுள்ளது.
அமெரிக்கா மற்றும் இஸ்ரேல் இணைந்து ஈரான் மீது மேற்கொண்டதாகக் கூறப்படும் இராணுவத் தாக்குதல்களின் பின்னர், மொஜ்தபா கமேனியின் உடல்நிலை தொடர்பில் பல்வேறு செய்திகள் வெளியாகி வருகின்றன.
தந்தையின் மறைவுக்குப் பின்னர் ஈரானின் உச்ச தலைவராக பொறுப்பேற்றதாகக் கூறப்படும் மொஜ்தபா கமேனி இதுவரை எந்தவொரு பொது நிகழ்விலும் பங்கேற்கவில்லை எனவும், அவரது குரல் பதிவுகளும் வெளியாகவில்லை எனவும் தெரிவிக்கப்படுகிறது.
அதேவேளை, ஈரானின் அதிகாரப்பூர்வ ஊடகங்கள் வாயிலாக அவரது பெயரில் அறிக்கைகள் மாத்திரமே வெளியிடப்பட்டு வருவது, அவரது உடல்நிலை தொடர்பான சந்தேகங்களை மேலும் அதிகரித்துள்ளதாக கூறப்படுகிறது.
முன்னதாக இடம்பெற்ற தாக்குதலில் மொஜ்தபா கமேனி காயமடைந்ததாகவும், அதன் காரணமாக அவரது தோற்றத்தில் மாற்றம் ஏற்பட்டிருக்கலாம் எனவும் சில ஊடகங்களில் செய்திகள் வெளியாகியிருந்தன. இதனால் அவர் பொதுமக்களின் பார்வையில் இருந்து விலகி இருப்பதாகவும் தகவல்கள் தெரிவிக்கின்றன.
இதனிடையே, அமெரிக்க ஜனாதிபதி டொனால்ட் ட்ரம்ப், ஈரானின் உயர்மட்ட இராணுவத் தலைமை அழிக்கப்பட்டுள்ளதாகவும், குறிப்பிட்ட இராணுவ நடவடிக்கைக்குப் பின்னர் கமேனி 90 சதவீதம் செயலிழந்துவிட்டதாகவும் கூறியதாக செய்திகள் தெரிவிக்கின்றன.
தற்போது இஸ்ரேலிய ஊடகங்கள் மொஜ்தபா கமேனியின் உடல்நிலை குறித்து பரபரப்பான தகவல்களை வெளியிட்டு வருகின்ற நிலையில், இந்த தகவல்களின் உண்மைத்தன்மை தொடர்பில் ஈரான் தரப்பிலிருந்து இதுவரை அதிகாரப்பூர்வ மறுப்பு வெளியாகவில்லை என தெரிவிக்கப்படுகிறது.
